3 jylda Astanada 89 bala ózine qol jumsaýǵa talpyndy
ASTANA. QazAqparat - Sońǵy úsh jylda Astanada 89 bala ózine-ózi qol jumsaýǵa talpyndy. Bul jaıynda búgin elordadaǵy Tamyz keńesinde Astana ákimi Imanǵalı Tasmaǵambetov aıtty.
«Tek sońǵy úsh jylda elordada kámelet jasyna tolmaǵandar arasynda sýıtsıdke talpynǵan 89 oqıǵa tirkelip, onyń 14-inde balalar kóz jumdy»,- dep toqtaldy ákim. Osy oraıda mundaı jaǵdaılar negizinen Internetke baılanysty ekenin, ıaǵnı kommýnıkatsııanyń aýqymdy quraly retinde ol sýıtsıd týraly aqparattardy kóptep taratyndyǵyn sóz etti. «Jeli resýrstarynyń taldaýyna qaraǵanda, ózine-ózi qol jumsaý máselesi ǵalamtordy paıdalanýshy balalardyń aýqymdy bóligi arasynda keń taraǵan taqyrypqa aınalǵan»,- dedi ol. Munymen qosa sýıtsıdtik áreketterge eresekter tarapynan túsinbeýshilik, onyń ishinde muǵalimder jaǵynan bolatyn qysym yqpal etetindigi aıtyldy. «Bul pikirdi saýalnamaǵa qatysqan oqýshylardyń 35 paıyzǵa jýyǵy alǵa tartyp otyr. Osyndaı jaǵdaı mektep baǵdarlamasyna psıhologııa pánin engizý máselesin kótertti. Ol óz kezeginde ata-analarǵa jáne barsha qoǵamǵa balalardy azǵyndyqtan qorǵaýǵa jáne áleýmettik jáne zııatkerlik turǵyda qorǵalǵan balalardy tárbıeleýge septigin tıgizýi tıis», - dedi I.Tasmaǵambetov.
