3 jylda qazaqstandyqtar 4 myń qarýdy óz erkimen ótkizgen
ALMATY. KAZINFORM — Elimizde zańsyz qarýdy quqyq qorǵaý organdaryna ótkizýge múmkindik beretin aktsııa ótip jatyr.
Almaty qalasynda jáne Almaty oblysynda ótken kúnderi qarý qoldanylǵan birneshe qylmys tirkeldi. 9 mamyr kúni Almaty oblysynyń Talǵar aýdanynda atys boldy. Janjaldan keıin 4 adam aýrýhanaǵa jatqyzylǵan.
10 kúnnen keıin Almaty meıramhanalarynyń birinde atys boldy. Kúdikti tapanshamen óz tanysynyń aıaǵyn jaraqattady.
Óńirdegi jaǵdaıǵa baılanysty Kazinform agenttigi Іshki ister mınıstrligine saýal joldap, zańsyz aınalymdaǵy qarýdy tárkileý, atys qarýy qoldanylatyn qylmystyń aldyn alý maqsatynda qandaı sharalar qoldanylyp jatqanyn surady.
Vedomstvo jaýabyna sáıkes, bıyl 21 sáýirden bastap elimizde «Zań jáne tártip» qaǵıdatyn iske asyrý aıasynda halyqtan zańsyz saqtalǵan atys qarýyn, oq-dárilerdi jáne jarylǵysh zattardy satyp alý boıynsha aktsııa ótip jatyr.
— Mundaı aktsııa kóp jyldan beri turaqty ótkizilip keledi. Osyndaı aktsııalar aıasynda tek 2022-25 jyldar aralyǵynda el azamattary polıtsııa organdaryna óz erkimen 4 myńnan astam atys qarýyn ótkizgen. Bul is-shara qoǵamdyq qaýipsizdikti qamtamasyz etýge jáne atys qarýyn qoldana otyryp jasalatyn qylmystardyń aldyn alýǵa baǵyttalǵan, — dep habarlady mınıstrlikten.
Al Almaty qalasy Polıtsııa departamentiniń málimetinshe, 2022 jyldan bastap qazirgi ýaqytqa deıin megapolıs turǵyndary 1 650 azamattyq qarý tapsyrǵan.
Onyń ishinde:
— 2022 jyly — 362;
— 2023 jyly — 238;
— 2024 jyly — 865;
— 2025 jyly — 185.
Іshki ister mınıstriligi agenttik saýalyna jaýap ber otyryp, jyl saıyn ótkiziletin qarý-jaraq zattaryn satyp alý aktsııasy qoǵamdyq qaýipsizdikti qamtamasyz etý boıynsha qabyldanyp jatqan jalǵyz shara emes ekenin málimdedi.
— Turaqty túrde aımaqtyq jáne respýblıkalyq «Qarý», «Quqyqtyq tártip» jedel-profılaktıkalyq is-sharalar ótkiziledi, olardyń aıasynda zańsyz aınalymnan qarý men oq-dáriler alynady. Qabyldanyp jatqan sharalardyń tıimdiligi atys qarýyn qoldana otyryp jasalatyn qylmystardyń jyl saıyn azaıǵanyn kórsetti. Máselen, keıingi 5 jylda atalǵan sanattaǵy qylmystardyń sany eki esege qysqardy. 2020 jylǵy 221-den 2024 jyly 118-ge deıin azaıǵan. Al osy jyly esepti kezeńde mundaı qylmys 30%-ǵa azaıǵan, — delingen vedomstvo jaýabynda.
Іshki ister mınıstrligi qarý alyp júrýge quqyǵy bar azamattar sanatyn atady:
— «Jekelengen qarý túrleriniń aınalymyna memlekettik baqylaý jasaý týraly» zańnyń 15-babyna sáıkes 18 jasqa tolǵan Qazaqstan Respýblıkasy azamattary turǵylyqty jeri boıynsha ishki ister organdarynan naqty qarý túrin ıemdenip alýǵa ruqsat alǵannan keıin azamattyq qarý ıemdenip alýǵa quqyǵy bar.
— Qazaqstan Respýblıkasynyń 16 jasqa tolǵan azamaty sporttyq maqsatta laqtyrylatyn qarýdy (sadaqtar men arbaletterdi) ıemdenip alýǵa, saqtaýǵa, alyp júrýge jáne paıdalanýǵa quqyly.
Sonymen qatar tártip saqshylary Qylmystyq kodeksiniń 287-babynda qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrgeni úshin jaýapkershilik qaralsa, qarýdy zańsyz jasaǵandar osy kodekstiń 288-baby boıynsha jaýapqa tartylatynyn eskertti.
Jalpy mınıstrlik málimetinshe, búgingi kúni elimizde azamattyq jáne qyzmettik qarý saýdasymen aınalysatyn mamandandyrylǵan 83 dúken bar. Almaty qalasy aýmaǵynda 15 ańshylyq dúkeni jumys isteıdi. Al Almaty oblysynyń aýmaǵynda 5 lıtsenzııalanǵan qarý-jaraq dúkeni bar. Biraq olardyń bireýi ǵana jumys istep tur.
Eske salaıyq, jyl basynda Almatyda zańsyz qarý qoldanǵan 16 jastaǵy jasóspirim ustalǵan.