3 jylda egis alqaptary tutynatyn sý kólemi 700 mln tekshe metrge azaıǵan
ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Úkimet otyrysynda sý únemdeý tehnologııalarynyń ıgiligin naqty kimder kórip jatqanyn aıtty.
– Sý únemdeý tehnologııalaryn engizýge keıingi úsh jylda 55 mlrd teńge qarjy bóldik. Aldaǵy 3 jylǵa taǵy 200 mlrd teńgeden astam qarajat bólemiz. Osynyń dıqandarǵa naqty áseri qandaı, - dep surady Premer-mınıstr Oljas Bektenov.
Mınıstrdiń sózine qaraǵnada, 2023 jyldan bastap egisterde sý tutyný kólemi turaqty túrde azaıa bastaǵan.
– Daqyl sebiletin sýarmaly alqaptyń kólemi 1,2 mln gektar mólsherinde saqtalǵanymen paıdalanyp jatqan sý kólemi azaıyp keledi. Mysaly 2023 jyly 11,8 mlrd tekshe metr bolsa, bıyl 11,1 mlrd tekshe metr bolyp otyr. Úsh jyldyń ishinde sý tutyný kólemi 700 mln tekshe metrge qysqarǵan. 2025 jylǵa kelsek, aldyn ala esepter boıynsha, sý únemdeıtin tehnologııalardyń arqasynda jyl kóleminde 874 mln tekshe metr ylǵal únemdelgen. Biraq byltyr qurǵaqshylyq bolǵan óńirlerde vegetatsııa kezeńin 20 kún erte bastadyq. Sýarmaly alqaptardyń ónimdiligi birneshe paıyzǵa artyp otyr. Osylaısha tıimdiligin naqty kórip otyrmyz, - dedi Nurjan Nurjigitov.
Premer-mınıstr sol nátıjelerdi halyqqa durystap túsindirýdi tapsyrdy.
Aıta keteıik, búgin Úkimet otyrysynda sý únemdeý tehnologııalaryn engizý sharalaryn pysyqtady.