3 jylda 24 myń stýdent oqýdan shyǵarylǵan

ASTANA. KAZINFORM — Olardyń oqýyna 20 mlrd teńgege jýyq qarjy jumsalyp, keri óndirilmegen. Bul jóninde QR Joǵary aýdıtorlyq palatasynyń múshesi Tilegen Kaskın málimdedi. 

— 2022–2024 jyldary shamamen 24 myń stýdent oqýdan shyǵarylǵan, olardyń oqýyna 19,6 mlrd teńge jumsalǵan. Sonyń ishinde 10 myń stýdent boıynsha júıede paıdalanylǵan granttar somasy týraly málimet múldem joq, — dedi ol.

Budan bólek, Tilegen Kaskın oqýdan shyǵarylǵan stýdentter boıynsha qarajatty qaıtarýdyń tolyqqandy tetigi joqtyǵyn atap ótti.

— Sonymen qatar, mindetti jumyspen óteýden jaltarýdyń magıstratýraǵa túsip, keıin oqýdan shyǵý arqyly júzege asyrylatyn qosymsha shemasy da qalyptasqan. Tek osy sanat boıynsha memleketke keltirilgen boljamdy zalal 10,8 mlrd teńgege baǵalanady, — dedi Joǵary aýdıtorlyq palata múshesi.

Aıta keteıik, buǵan deıin elimizde jetkilikti maman daıarlanbaı otyrǵan asa mańyzdy segiz sala anyqtalǵanyn jazǵanbyz.