3 jeltoqsan kúni Astanadaǵy «Alaý» Muz saraıynda buqaralyq konkı tebý maýsymy ashylady
ASTANA. 2 jeltoqsan. QazAqparat /Gúlmıra Alıakparova/ - Senbi, 3 jeltoqsan kúni Astanadaǵy «Alaý» Muz saraıynda buqaralyq syrǵanaý maýsymy ashylady. Bul týraly Muz saraıynyń baspasóz qyzmetinen habarlady.
«Alaýdaǵy» buqaralyq konkı tebý - qala turǵyndary men qonaqtary úshin sportpen shuǵyldanýdy barynsha qoljetimdi etý maqsatyn tutatyn - áleýmettik joba. Sol sebepti de, buqaralyq syrǵanaý kezinde baǵalar barynsha tómendetildi. Máselen, arenaǵa kirý bıleti - 4 saǵatqa 500 teńge turady. Konkılerdi jalǵa alý quny da osyndaı - 1 saǵatqa 500 teńge.
Arenada dámhana, demalý orny, balalardyń oıyn alańy men Wi-Fi bar.
«Alaý» muz saraıyna kópshiliktiń qoljetimdigin qamtamasyz etý baǵdarlamasyn júzege asyrýdyń birinshi kezeńinde sportshylar úshin halyqaralyq deńgeıdegi jarystar men jattyǵýlardy ótkizýge jaǵdaılar jasaldy. Ekinshi kezeńde Muz saraıynda balalar sportyn damytý bólimi ashylyp, konkımen júgirý, dopty jáne shaıbaly hokkeı, short-trek, mánerlep syrǵanaý boıynsha sektsııalar ashyldy. Balalar úshin jattyǵýlar tegin júrgiziledi.
Úshinshi kezeńde keshen qonaqtary úshin jaıly qonaq úı men meıramhana ashyldy. Sondaı-aq iri jarystar ótetin kúnderi jumys isteıtin jyldam tamaqtaný oryndary iske qosyldy. Kelesi qadam - buqaralyq syrǵanaýlar.
