3 jasynda joǵalǵan qyzdy ata-anasy 24 jyldan keıin tapty
ASTANA. QazAqparat - Qytaı turǵyny 24 jyl izdeýden keıin 3 jasynda joǵalyp ketken qyzyn tapty. Van Mın Tsın osy jyldardyń ishinde izdeýin toqtatpady. Bul úshin tipti taksı júrgizýshi bolyp jumysqa ornalasty. Ol áıteýir bir kúni qyzynyń nemese ony tanıtyn jolaýshynyń kólikke otyratyndyǵyna senimin joǵaltpady dep habarlaıdy bbc.com.
Mın Tsın jyldar boıy qyzynyń joǵalǵandyǵy týraly habarlandyrý taratyp keldi. Van Mın Tsın men áıeli Lıý Den In ol kezde jemis-jıdek satýmen aınalysqan. Birde keshkilik aqshasyn usatpaq bolyp kórshi dúkenge bas suqqan Van Mın Tsın qaıtyp kelgen kezde qyzyn tappaı qalady.
2015 jyly Van izdeý geografııasyn keńeıtip, Didi Chuxing kompanııasyna taksı júrgizýshi bolyp ornalasty.
Ol artqy oryndyqqa kóp jyldan beri qyzyn izdep júrgendigin jazyp qoıǵan. Vanda Tsı Fenniń sýreti joq edi, sondyqtan oǵan qatty uqsaıtyn kishi qyzynyń fotografııasyn ilgen. Al Vannyń jolaýshylary ákesi birneshe jyldan beri qyzyn izdep júrgendigin áleýmettik jelilerge jarııalaı bastady.
Polıtsııa da qarap qalmady. Oǵan uqsas jandardyń DNQ-sy sáıkes kelmeı jatty.
Mine qyzyq, ótken jyldyń sońynda izdeý jumystarynda úmit oty jandy. Polıtsııada eńbek etetin sýretshi Vannyń eseıgen shaǵyna sáıkes keletindeı etip portretin saldy. Ol ınternet arqyly taratyldy.
Vannyń otbasynan myńdaǵan shaqyrym qashyqtyqta, Qytaıdyń soltústiginde tirshilik keship jatqan 27 jasar Kan In birde bul portretti kórip ondaǵy áıeldiń ózine aýmaı qalǵandyǵyna tań qalǵan.
DNQ-saraptama jasaýǵa sheshim qabyldanǵan. Onyń nátıjesi kóńildegideı bolyp shyqty. Van óziniń joǵalǵan qyzyn taýyp, 3 sáýirde Gırın provıntsııasynda turatyn Kan In óziniń kúıeýimen jáne ul-qyzdarymen Chendýǵa ushyp keldi.
Qytaılyq BAQ-tardyń jazýynsha, Kan Indi kishkentaı kezinde Chendýdan nebári 20 shaqyrym qashyqtyqta ornalasqan kórshiles qaladaǵy erli-zaıyptylar asyrap alǵan. Olar búldirshindi Chendýǵa baratyn joldyń jaǵasynan taýyp alǵan eken.
