3 jasar qyzdy talap óltirgen ıtter karantınde jatyr
ALMATY. QazAqparat - 3 jastaǵy qyz balany talap óltirgen rotveıler tuqymdas ıtter karantınde jatyr. Bul týraly QazAqparat tilshisine qalalyq Kásipkerlik pen ındýstrıaldy damý basqarmasynyń baspasóz hatshysy Ánel Qabıeva aıtty.
Onyń aıtýynsha, rotveıler - qabaǵan ıtter tuqymyna jatady. Mundaı ıtterdi asyraý úlken jaýapkershilikti talap etedi.
«Menińshe, ata-analary durys qaramaǵan. Itterdiń nege dál sol sátte balaǵa tap bergenin anyqtaý múmkin emes. Eger rotveıler ıesi kınologtardyń kómegimen ıtterdi tárbıeleı bilse, janýardy áleýmettik ortaǵa beıimdeýge bolady. Qazir olar baqylaýda. Itterge qutyrý ekpesi salynǵan. Barlyǵy saraptamadan soń belgili bolady», - dedi Ánel Qabıeva.
Onyń aıtýynsha, ıtterdiń mıyn zertteý úshin olardy óltirý shart.
«Adam ólimi bolǵandyqtan, ıtterdi óltirýi múmkin. Biraq, ol úshin qojaıyny ruqsat berýi nemese sot sheshimi kerek. Itter 10 kúndeı karantınde jatady», - dedi Á.Qabıeva.
Sondaı-aq, ol keıbir otbasylarda rotveılerler ómir boıy otbasymen birge ómir súretindigin, alaıda ıtterge tán minezge mán berý kerektigin aıtty.
Aıta ketý kerek, qaıǵyly jaǵdaı Almatyda Samǵaý shaǵyn aýdanynda bolǵan edi. Rotveıler tuqymdas eki ıt ıesiniń 3 jasar qyzyn talap óltirgen bolatyn. Qaıǵyly oqıǵaǵa baılanysty qylmystyq is qozǵaldy.
