3 jasar qyzdyń óliminen keıin 622 stomatologııalyq klınıka tekserilip jatyr

ASTANA. KAZINFORM — Sońǵy ýaqytta, ásirese jekemenshik stomatologııalyq klınıkalarda balalarǵa jalpy narkozben birneshe tisti bir mezette emdeýge qatysty aryzdar jıilep jatyr. Bul týraly DSM basshysy Aqmaral Álnazarova aıtty.

Aqmaral Álnazarovanyń sózinshe, balalardy jalpy anestezııamen emdeý — qatań medıtsınalyq kórsetilimder boıynsha ǵana júrgizilýi tıis kúrdeli medıtsınalyq emshara. Kez kelgen klınıkadan narkozben emdeý kezinde anestezıologııalyq jáne reanımatologııalyq kómek standarttaryn saqtaý talap etiledi.

— Densaýlyq saqtaý mınıstri retinde bizdiń ustanymymyzdy egjeı-tegjeıli túsindirý mańyzdy dep sanaımyn. Balalardy jalpy anestezııamen emdeý — qatań medıtsınalyq kórsetilimder boıynsha ǵana júrgizilýi tıis kúrdeli medıtsınalyq emshara. Klınıka jekemenshik bolsyn nemese memlekettik bolsyn mundaı manıpýlıatsııalar úshin bilikti anestezıologtyń qatysýy, tıisti jabdyqtardyń bolýy, anestezıologııalyq jáne reanımatologııalyq kómek standarttaryn saqtaý talap etiledi, — dep mınıstr áleýmettik jelidegi paraqshasynda.

DSM basshysy atap ótkendeı, Bas prokýratýranyń talaby boıynsha, el boıynsha stomatologııalyq uıymdarǵa — barlyǵy 622 nysanǵa qatysty jospardan tys tekserýler júrgizilip jatyr.

Búgingi jaǵdaı boıynsha:

• 290 tekserý tirkeldi,
• 135 aıaqtaldy,
• 103 — jumys barysynda,
• 52 — tirkeýden alynǵan (klınıkalar is júzinde jumys istemeıdi),
• 26 — tirkeý satysynda.

Óńirlerdiń prokýratýrasy jibergen 316 nysannyń ishinde:

• 34 klınıka MÁMS/TMKKK sheńberinde qyzmet kórsetedi,
• 282 — tek aqyly negizde jumys isteıdi.

Densaýlyq saqtaý mınıstri jalpy anestezııa — bul «yńǵaıly optsııa» emes, erekshe saqtyqty talap etetin kúrdeli aralasý ekenin eske saldy.

— Uzaq narkoz jáne aýqymdy birmezgilde emdeý balanyń júrek-qantamyr, tynys alý jáne júıke júıesi tarapynan asqyný qaýpin arttyrýy múmkin. Ókinishke qaraı, jekelegen klınıkalar ata-analarǵa kommertsııalyq turǵydan qolaıly nusqany usynady — «barlyq tisti bir rette emdep beremiz». Alaıda mundaı tásil tek naqty medıtsınalyq kórsetkishter bolǵan jaǵdaıda, tekserýmen rastalǵan kezde ǵana oryndy, — dedi ol.

Álnazarova ata-analardy erekshe muqııat bolýǵa shaqyrdy.

— Osyndaı protsedýralarǵa kelisim bermes buryn, táýekelder, kórsetkishter jáne júrgizý sharttary týraly tolyq ári ashyq aqparatpen tanysý qajet. Balanyń qaýipsizdigi árqashan birinshi orynda turýy tıis — jáne Densaýlyq saqtaý mınıstrligi osy qaǵıdatty qatań túrde ustanatyn bolady, — dep túıindedi DSM basshysy.

Budan buryn Densaýlyq saqtaý birinshi vıtse-mınıstri Tımýr Sultanǵazıev elimizdegi stomatologııalardy jappaı tekserý josparda joq ekenin aıtqan edi.