3 jasar búldirshinniń ólimi: Shymkenttegi dámhanada tekserý bastaldy
ShYMKENT. QazAqparat - Shymkenttegi «Adana» dámhanasynda astan ýlanyp, qaıtys bolǵan búldirshinniń ólimine qatysty jospardan tys tekserý bastaldy. Bul týraly QR Densaýlyq saqtaý mınıstrligi Qoǵamdyq densaýlyq saqtaý komıtetine siltememen QazAqparat tilshisi habarlaıdy.
Komıtettiń habarlaýynsha, aldyn ala tekserý sharalary kezinde qaıtys bolǵan búldirshin men onyń anasy jegen astardan bakterologııalyq synamalar alyndy. Olardyń qatarynda sútti-banandy kokteıl men pıdeniń salmasy, qoldanylǵan aýyz sý bar. Budan bólek tamaqtaný ornynyń qyzmetkerleri de tıisti tekserýden ótken. Odan bólek, búldirshinniń januıasy úılerine pıtstsa men sýshıge tapsyrys bergeni anyqtaldy.
"Búginde alynǵan synamalardyń barlyǵy zertteýge jiberildi. Sonymen qatar búldirshinniń ólimine baılanysty Shymkent qalalyq Densaýlyq saqtaý basqarmasy men Túrkistan oblysy Qoǵamdyq densaýlyq saqtaý departamenti tarapynan arnaıy komıssııa qurylyp, onyń quramyna salalyq táýelsiz sarapshylar (balalar juqpaly aýrýlar dárigeri, anestezıolog-reanımatolog) engizilip otyr. Atalǵan jaıt boıynsha Shymkent qalalyq juqpaly aýrýlar aýrýhanasynda tekserý sharalary bastalǵan" delingen habarlamada.
