3 jasar balany qutqarǵan órt sóndirýshi Elbasynyń marapatyn aldy

ALMATY. QazAqparat - Almatylyq órt sóndirýshi Elbasy atynan memlekettik marapat aldy, dep habarlaıdy QazAqparat tilshisi qalalyq TJD baspasóz qyzmetine silteme jasap.

Qalalyq TJD №6 órt sóndirý bóliminiń komandıri  Saıat Rahımov órtengen úıden balany qutqaryp shyqqan bolatyn.

Tótenshe oqıǵa 13 shilde kúni «Kóktem-1» shaǵynaýdanynda boldy. Túski 12:46 shamasynda №16 úıde órt shyqqany týraly shuǵyl habarlama túsken.

Oqıǵa ornyna jetken órt sóndirýshiler qoıý tútin býdaqtaǵan 4-qabattan shyǵyp jatqan balanyń daýsyn estip, joǵaryǵa kóterilgen.

Alaıda esik syrtynan jabyq bolǵandyqtan, avtobaspaldaqty qoldanbaq bolǵan. Degenmen, aýlada bos oryn bolmaǵandyqtan bul áreketten túk shyqpady.

Starshına Rahımov Saıat jyljymaly úsh tizbekti baspaldaqpen úshinshi qabatqa deıin jetip, odan ári qol baspaldaǵyn paıdalana otyryp, 4 qabatqa shyqty.

Órt sóndirýshi úıden balany alyp shyǵyp, terezege taqalǵan tar baspaldaq arqyly balany abaılap túsirdi.

Osyndaı erligi úshin Qazaqstan Respýblıkasy táýelsizdigi kúnine oraı QR Prezıdenti Nursultan Nazarbaevtyń №594 Jarlyǵyna sáıkes Rahımov Saıat Mahmutuly «Erligi úshin» medalimen marapattaldy.