3 toqsanda azyq-túlik ónimderiniń barlyq negizgi toptary boıynsha tutynýdyń ósýi baıqaldy
ASTANA. 28 jeltoqsan. QazAqparat /Qanat Mámetqazyuly/ - 2011 jylǵy 3 toqsanda ótken jyldyń tıisti kezeńimen salystyrǵanda azyq-túlik ónimderiniń nan jáne jarma ónimderinen basqa barlyq negizgi toptary boıynsha tutynýdyń ósýi baıqaldy. Bul týraly QR Statıstıka agenttiginen habarlandy.
«Qazaqstan Respýblıkasy úı sharýashylyqtaryndaǵy (halyqtyń ortasha jan basyna shaqqanda) eń kóp tutynatyn sút jáne sút ónimderi, eń az tutynatyn balyq jáne teńiz ónimderi bolyp tabylady. Sonymen qatar, 2011 jylǵy 3 toqsandaǵy qalalyq jáne aýyldyq jerlerdegi halyqtyń tamaq ónimderiniń negizgi túrlerin tutynýyn salystyrǵanda eń joǵary dıfferentsıatsııa nan men jarma ónimderin jáne jumyrtqany tutyný boıynsha baıqalady», - delingen baspasóz qyzmeti taratqan málimdemede.
Budan bólek, agenttik 2011 jylǵy 3 toqsanda halyqtyń tamaq ónimderiniń negizgi túrlerin tutynýdyń (halyqtyń ortasha jan basyna shaqqanda) óńirlik aspektisin qarastyra otyryp, oblystar boıynsha eń kóp jáne eń az tutynatyn tamaq ónimderiniń ara salmaǵyn da jiktep shyǵypty. Oǵan sáıkes, nan ónimderi jáne jarma ónimderin eń az tutynanyn Astana qalasy (24,3 keli) bolyp belgilense, eń kóp tutynatyn oblys Qyzylorda (37,0 keli) bolyp otyr. Sonymen qatar, respýblıka boıynsha et jáne et ónimderin eń az tutynatyn Ońtústik Qazaqstan oblysy (10,0 keli) bolsa, et tutynýdan birinshi orynǵa Almaty qalasynyń turǵyndary (20,1 keli) shyǵyp otyr. Sondaı-aq, derekterge súıensek, kókónisterdi eń az tutynatyn Soltústik Qazaqstan oblysy (19,8 keli) bolsa, Qyzylorda (32,5 keli) eń kóp tutynatyn óńir bolyp tabylady.
