3 tamyzda Qazaqstanda naızaǵaı jarqyldap, jańbyr jaýady, jel kúsheıedi - aýa raıy boljamy
ASTANA. 2 tamyz. QazAqparat - 3 tamyzda Qazaqstannyń basym bóliginde atmosferalyq aǵyndardyń ótýine baılanysty aýa raıynyń turaqsyzdyǵy saqtalady, keı jerlerde naızaǵaı jarqyldap, jańbyr jaýady, jel kúsheıedi, dep habarlaıdy Qazgıdrometke silteme jasap, QR TJM baspasóz qyzmetinen.
Aqmola, Aqtóbe, Pavlodar, Shyǵys Qazaqstan, Qaraǵandy oblystarynda, kúndiz Batys Qazaqstan, Atyraý oblysynda keı jerlerde jel 15-20 m/s-qa kúsheıedi dep kútilýde, Batys Qazaqstan oblysynda shań kóterilip, daýyl turady.
Qostanaı, Soltústik Qazaqstan oblystarynda túnde jáne tańerteń keı jerlerde tuman túsedi, jel 15-20 m/s-qa deıin kúsheıedi.
Mańǵystaý oblysynda túnde jáne tańerteń jaǵalaýda tuman túsedi dep kútilýde. Almaty, Atyraý oblysynda, keı jerlerde Ońtústik Qazaqstan, Qaraǵandy oblystarynda kúndiz qatty ystyq saqtalady. Respýblıkanyń batysynda, ońtústiginde, ońtústik-shyǵysynda jáne ortalyǵynda keı jerlerde tótenshe joǵary órt qaýpi saqtalady.
Jýyrdaǵy úsh táýlikte Almaty oblysynyń ózenderinde bıik taýdan jınalǵan sýdyń esebinen sý shyǵynynyń ulǵaıýy kútilýde. Respýblıkanyń ońtústigi jáne shyǵysynyń ózenderinde sý deńgeıiniń turaqsyzdyǵy kútilýde. Qazaqstannyń jazyqty aýmaǵyndaǵy ózenderde gıdrologııalyq tártipte aıtarlyqtaı ózgerister kútilmeıdi.
