3 shaqyrymǵa 960 mln teńge: Aqtóbede byltyr bastalǵan jol qurylysy bıyl toqtap qaldy
AQTÓBE. KAZINFORM – Jol salý, jaryqtandyrý, sýaǵar júıesiniń qurylysy tolyq toqtap tur. Qalalyq ákimdik merdigerge eskertý berdi.
Aqtóbe qalasyndaǵy Abaı kóshesi men Edige batyr dańǵylyna shyǵar jolynyń qurylysy 2024 jyly bastaldy. Joba quny - 959 983 636 teńge. Byltyr asfalttiń negizin sala bastaǵanymen, bıyl munda jumysshylar kelmegen. Aýyspaly joba qazir jarty jolda tuqtap tur. Abaı kóshesimen qıylysatyn taǵy úsh kóshege de jóndeý jartylaı jasalýy tıis.
- Men Dáýlet kóshesiniń turǵynymyn. Byltyr Aqtóbe qalasy Astana aýdany ákimdiginde, Aqtóbe qalalyq ákimdiginde boldym, oblys ákimdigine hat ta jazdyq. Bizge jaýap ta keldi. «Burynǵydaı birtindep emes, 5-6 kóshe qosylady» dedi. Sodan keıin habar joq. Byltyr qyryp, tazartyp turatyn edi. Bıyl ol da joq. Tap qazir asfalttaıdy dep aıta almaımyn. Eń bolmasa mektepke baratyn, aıaldamaǵa shyǵatyn jol kerek, balalarǵa obal. Kóshede artyq baǵana kóp, sony alyp tastasa eken. Sosyn aıaldamada da salamyz degen. Bir jaǵynda bar, bir jaǵynda joq. Qaladan eskisin ákelip qoısa eken, - dedi aýyl turǵyny Seıilhan Tólebaev.
Aýyl turǵyndary depýtatty, Aqtóbe qalalyq turǵyn úı – kommýnaldyq sharýashylyq, avtomobıl joldary jáne jolaýshylar kóligi bóliminiń basshysyn shaqyryp, suraq qoıdy.
- «Kompanııa Jeruıyq-Konsaltıng» JShS Abaı kóshesin tolyq jáne úsh kósheni ishinara qamtıtyn qurylys-montaj jumysyn júrgizýi kerek edi. Qazir jumys baıaý júrýine, tipti toqtap qalýyna baılanysty eskertpe hat joldadyq. Eger sol merzimde qyzmetin aıaqtamasa, sotqa berip, shartty buzamyz. Jol qurylysymen qatar jaryqtandyrý, sýaǵary bar, - dedi Aqtóbe qalalyq turǵyn úı - kommýnaldyq sharýashylyq, avtomobıl joldary jáne jolaýshylar kóligi bóliminiń basshysy Álibı Amanshıev.
2024 jyly bastalǵan qurylys-montaj jumysy 2025 jyldyń 31 tamyzy kúni aıaqtalýy tıis. Alaıda merdiger bul ýaqytta aıaqtaı almaıdy. Qazir jumystyń alǵashqy satysy ǵana atqarylǵan. Aqtóbe qalalyq ákimdigi 3 shaqyrymnan sál asatyn jobaǵa bıýdjetten 960 mln teńgege jýyq qarjy bólip qoıǵan.
Aıta keteıik, bıyl oblysta aýdandyq, oblystyq mańyzy bar joldarǵa 50 mlrd teńgeden astam qarjy bólindi. Bul qarjyǵa 400 shaqyrym jol jóndelip, salynyp jatyr.