3 sáýirde soltústik pen shyǵysta jaýyn-shashyn, tuman, kóktaıǵaq jáne jeldiń kúsheıýi kútiledi
ASTANA. 2 sáýir. QazAqparat - Qazaqstannyń basym aýmaǵynda aýa raıy jaýynsyz bolady dep kútilýde, soltústik jáne shyǵystyń keı jerlerinde jaýyn-shashyn, tuman, kóktaıǵaq bolyp, jel kúsheıedi.
Bul týraly Qazgıdrometke silteme jasaı otyryp, QR TJM-niń baspasóz qyzmeti habarlady.
Mańǵystaý jáne Atyraý oblystarynyń keı jerlerinde 15-22 m/s jyldamdyqpen jel soǵyp, tuman bolady dep kútilýde.
Qostanaı oblysynda túnde aýa raıy tumandanyp, kóktaıǵaq bolady, keı jerlerinde 15-20 m/s jyldamdyqpen jel kúsheıedi.
Soltústik-Qazaqstan oblysynyń keı jerlerinde túnde qarly boran, tuman, kóktaıǵaq bolady, 15-20 m/s jyldamdyqpen jel soǵady, kúndiz jeldiń qarqyny 25 m/s jyldamdyqqa deıin jetedi dep kútilýde.
Qaraǵandy, Shyǵys-Qazaqstan oblystarynyń keı jerderinde túnde jáne tańerteń tuman bolady.
Ońtústik-Qazaqstan, Qyzylorda oblystarynda, kúndiz Jambyl oblysynyń keı jerlerinde jel 15-21 m/s jyldamdyqqa deıin kúsheıedi, Jambyl oblysynyń keı jerlerinde tuman bolady.
Aldaǵy táýlikterde batystyń jáne respýblıka ortalyǵynyń jekelegen ózenderinde (Jaıyq, Elek, Úlken Ózen, Nura, Esil ózeniniń bastaýy) kóktemgi sý tasqyny kúsheıip, sý deńgeıi birtindep kóteriledi dep kútilýde. Respýblıkanyń Ońtústik, Ońtústik Shyǵys jáne Shyǵys ózenderiniń kópshiliginde sý deńgeıleriniń aýytqýy, taý etegindegi ózenderde sý deńgeıiniń ulǵaıýy baıqalady. ShQO-daǵy Ertis ózeninde muzdyń buzylýy, sý deńgeıiniń kóterilýi kútiledi.
