3 sábıdi qutqarǵan stýdent: Qorqýǵa ýaqyt bolǵan joq
ÓSKEMEN. QazAqparat - Semeılik stýdent kolledj jataqhanasynan shyqqan órtten úsh balany qutqaryp qaldy, dep habarlaıdy QazAqparat tilshisi.
26 qańtar kúni Semeıdegi qurylys kolledjine tıesili jataqhananyń besinshi qabatynda elektr esepteýish pen avtomat turǵan qalqannan órt shyqqan. 4-kýrs stýdenti Jasulan Berekeev osy jataqhananyń tórtinshi qabatynda turady. Ústińgi qabattan jylaǵan balanyń daýsyn estigen ol qutqarýshylardyń kelýin kútpesten, óz betimen áreketke kóshken. Balany úshinshi qabatta turǵan eresekterge tapsyra salyp, ústińgi qabattyń basqa bólmelerin de tekserip shyqpaq bolady. Sonyń nátıjesinde taǵy eki balany ajal aýzynan alyp qalǵan.
«Balalardyń betin kúrtkemen búrkedim de, tómenge tústim. Bári qas qaǵymda ótti. Qorqýǵa ýaqyt bolǵan joq», - deıi 21 jastaǵy jigit.
Órt sóndirýshiler kelgenshe jataqhana turǵyndary qyzyl jalynmen óz betterinshe arpalysypty. Osynyń arqasynda tilsiz jaý basqa qabattarǵa tarap úlgermegen.
Qazir Jasulan Berekeev qutqarǵan úsh bala da din aman. Kolledj basshylyǵy stýdentti kórsetken erligi úshin marapattaıtyn boldy.
