3 myńnan astam tutynýshy sapasyz taýarlar men qyzmetterge qatysty aryzdandy

ASTANA. QazAqparat - 2014 jyly jáne osy kúnge deıin Tutynýshylar ulttyq lıgasyna «jedel qońyraý» men saıt arqyly 3150-den astam tutynýshy sapasyz taýarlar men qyzmetterge qatysty aryzdandy. Bul týraly atalǵan lıganyń málimetinde habarlandy.

Shaǵymdardyń ishinde 600-dan astamy turmystyq tehnıkaǵa, 560-y azyq-túlik taýarlaryna, 455-i ónerkásip taýarlaryna, 270-i týrızm men áýe qyzmetterine, sondaı-aq 177-si medıtsınalyq qyzmetterge qatysty bolǵan eken. Atap aıtqanda, Tutynýshylar ulttyq lıgasy 22 aryz boıynsha sotqa júginip, onyń nátıjesinde sottyń sheshimimen jalpy somasy 11 mln. teńgeni quraıtyn talaptar qanaǵattandyryldy. Al qalǵan shaǵymdar boıynsha daýlar sottan tys medıatsııa jáne basqa da joldar arqyly sheshildi.

«Tutynýshylardyń ulttyq lıgasy medıatsııany damytý boıynsha belsendi jumys atqarýda. Byltyrǵy jyly atalǵan balamaly ádistiń kómegimen Qazaqstanda 12 myńnan astam azamattyq ister óz sheshimin tapty»,-delingen lıga málimetinde.