3 myń eriktige qazaqstandyq QazCovid-in vaktsınasy egildi

NUR-SULTAN. QazAqparat – Úsh myń eriktige otandyq QazCovid-in vaktsınasy egildi. Bul týraly búgin OKQ ótken baspasóz máslıhatynda Densaýlyq saqtaý birinshi vıtse-mınıstri Marat Shoranov aıtty, dep habarlaıdy QazAqparat tilshisi.

«11 qańtar kúni eriktilerdi irikteý aıaqtalyp, 3000 adamǵa egildi. Qazirgi ýaqytta zertteýge qatysýshylarǵa dınamıkalyq baqylaý júrgizilýde. Vaktsınatsııadan qorǵanys áseri birinshi dozany engizgennen keıin 12 kúnnen keıin biline bastaıdy, biraq tolyq qorǵaýdy qamtamasyz etý úshin eki doza qajet, olardy 19 kúnnen 23 kúnge deıingi aralyqpen engizý usynylady. Vaktsına organızmniń ımmýndyq reaktsııasyn týdyrady», - dedi Marat Shoranov OKQ-da ótken baspasóz máslıhatynda.

Osydan keıin ımmýndyq júıe vırýsty tanyp, antıdeneler paıda bola bastaıdy. Aýrýmen kúresý úshin paıda bolatyn aqýyzdar, vırýsty este saqtap, eger vırýs qaıtadan denege ense, onda ımmýndyq júıe dereý áreket etip, ony joıady. Onyń kóbeıýine jáne aýrýdyń týdyrýyna jol bermeıdi.

Eske salsaq, ǵalymdar qazaqstandyq QazCovid-in vaktsınasyn ázirleý tehnologııasy týraly aıtyp berdi.