3 myń atyraýlyq kóne Saraıshyq qazynalarymen qaıta qaýyshty

Bul shara Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý aıasynda kıeli jerlerimizdi tanytý, halqymyzdyń kóne tarıhynan syr shertetin, tektiligimizdi ulyqtaıtyn kóne ári qundy jádigerlerdi el arasynda, ásirese jastar arasynda dáripteý, qala turǵyndary men qonaqtaryna rýhanı-mádenı demalys syılaý maqsatynda uıymdastyryldy.

Mýzeı túninde kórermender tarıh qoınaýyndaǵy Saraıshyqtyń qazyna artqan kerýenimen, jeti hanymen, Seker kóldegi Jánibek hannyń aıdaı sulý qyzymen teatrlandyrylǵan kórinis aıasynda júzdesti. Sonymen qatar, shara barysynda sýretshi-bloger Ańsaǵan Mustafanyń kórmesi, 100 jańa esim ıegeri, jerlesimiz Ásemgúl Orazaevamen jáne oblystyq isker áıeldermen dastarhan basyndaǵy syrly suhbat ótti.  Budan bólek, jergilikti qolóner sheberleri Z.Orynbasarovanyń, aǵash sheberleri T.Jumalıev pen N.Qalıevterdiń kórme-jármeńkeleri, sheberlik sabaqtary, ulttyq sport oıyndarynan jarystar uıymdastyryldy.

«Mýzeı túni» merekelik sharasy - Atyraý oblysy tarıhı-ólketaný mýzeıinde 2012 jyldan beri júzege asyryp kele jatqan halyqaralyq iri áleýmettik mádenı-bilim berý jobasy. Dál osy túni mýzeı túrli jastaǵy, túrli kózqarastaǵy adamdardy, túrli ulttar men ulystardy toǵystyryp qana qoımaı, kóńil kókjıegin keńeıtip, tól mádenıetimizdiń nárinen sýsyndaýǵa shaqyrady. Mýzeı túniniń formaty jyl saıyn ózgerip otyrady. Bul joly mýzeı atyraýlyqtar men qala qonaqtaryna jańa baǵdarlamalar usyndy», - deıdi mýzeı basshysy Rashıda Harıpova.

Sondaı-aq, shara barysynda «Mýzeılik kvest» ıntellektýaldyq baıqaýynyń jeńimpaz komandasy marapattaldy. Mýzeı basshysy Rashıda Erimqyzy olarǵa kóne Taraz qalasynyń tarıhı oryndaryna saıahattaý joldamasyn tabystady.

Shara aıasynda mýzeıge kelgen balalar «Saraıshyqqa saıahat» mýltıplıkatsııalyq fılminiń kórsetilimin tamashalady.

Merekeniń sońy qýanyshqa kenelgen kórermenderdiń kóńilin «Zaman» toby kóterdi.