3 mln tonna bolat óndiriledi: Jambyl oblysynda jańa zaýyttyń qurylysy bastaldy
TARAZ. KAZINFORM – Memleket basshysynyń ekonomıkany ártaraptandyrý jáne ınvestıtsııa tartý boıynsha tapsyrmasyna sáıkes Jambyl oblysynda óńdeý ónerkásibindegi jobalardy qoldaý boıynsha keshendi jumystar júzege asyrylyp jatyr.
Sondaı josparly jobalardyń biri – Shý aýdanyndaǵy «Jibek joly» arnaıy ekonomıkalyq aımaǵynyń aýmaǵyndaǵy metallýrgııalyq zaýyt. Kásiporyn qurylysynyń bastalý saltanatyna Jambyl oblysynyń ákimi Erbol Qarashókeev qatysty.
Qytaıdyń jetekshi metallýrgııalyq kompanııasy – Fujian Hengwang Investment Co., Ltd óndiristik qýaty jylyna 3 mln tonnaǵa deıin jetetin metallýrgııalyq zaýyt salady. Investıtsııa kólemi – 564 mlrd teńgeni quraıdy. Joba aıasynda 2,5 myń jumys orny ashylady. Alǵashqy kezeńde 1 000-nan astam adam jumyspen qamtylady.
Kompanııa úlken tájirıbesin paıdalana otyryp, sapaly jáne básekege qabiletti ónim óndirý úshin temir rýdasyn tereń óńdeýdiń tolyq tsıklin jolǵa qoıýǵa nıetti:
– birinshi kezeńde 1 mln tonnaǵa deıin armatýra, sozba sym, buryshty bolat,
– ekinshi kezeńde 2 mln tonna profıldi jáne jolaqty bolat shyǵarylady.
Kásiporynda temirdi tikeleı qalpyna keltirý tehnologııasy engiziledi. Bul – ónim quramyndaǵy temirdiń joǵary mólsherde saqtalýyn qamtamasyz etedi. Ónerkásipte ǵylymı tásil men zamanaýı tehnologııalardyń tıimdi úılesýi óndiristiń ekologııalyq turaqtylyǵyn arttyra túsedi.
Zaýytty iske qosý – sabaqtas salalardyń damýyna berik negiz qalap, óńirdiń eksporttyq múmkindikterin arttyryp, jańa jumys oryndaryn ashýǵa múmkindik beredi.
– Memleket basshysy Qasym-Jomart Kemeluly Toqaev pen el Úkimetiniń qoldaýynyń arqasynda óńirde qolaıly ınvestıtsııalyq ahýal qalyptasyp, iri halyqaralyq jobalar iske asyrylyp jatyr. Ekonomıkanyń strategııalyq salalary júıeli túrde damyp keledi. Jambyl oblysynyń ınvestıtsııalyq qorjynynda jalpy quny 3,6 trıllıon teńge bolatyn, 10 myńnan astam jumys ornyn qurýdy kózdeıtin 82 joba bar. 2025 jyly jalpy somasy 175,2 mıllıard teńgege 30 jobany iske asyrý josparlanǵan. Bıylǵy jyldyń birinshi toqsanynda ótken jyldyń sáıkes kezeńimen salystyrǵanda 37,1 paıyzǵa kóp ınvestıtsııa tartyldy. Búgingi joba – memleket pen bıznes arasyndaǵy tabysty yntymaqtastyqtyń jarqyn úlgisi, jańa múmkindikter men turaqty ósýdiń sımvoly, - dedi oblys ákimi.
«Fujian Hengwang Investment Co., Ltd» kompanııasynyń basqarma tóraǵasy Tszen Chjaotsıan memleket tarapynan kórsetilgen qoldaýǵa alǵysyn bildirip, joba Qazaqstan men Qytaı arasyndaǵy baılanysty nyǵaıtýdaǵy qosymsha dáneker bolatynyna senim bildirdi.
