3 mln. gektardy quraıtyn aýyl sharýashylyǵy maqsatyndaǵy paıdalanylmaı kelgen 7 myń jer ýchaskesi anyqtaldy - Jer resýrstaryn basqarý agenttigi
ASTANA. 5 qarasha. QazAqparat - Aǵymdaǵy túgendeý barysynda aýdany 3 mln. gektardan astam aýyl sharýashylyǵy maqsatyndaǵy paıdalanylmaı kelgen 7 myń jer ýchaskesi anyqtaldy.
Bul týraly búgin Parlament Májilisinde ótken Úkimet saǵatynda málim boldy.
Depýtattar aldynda baıandama jasaǵan, Jer resýrstaryn basqarý agenttiginiń tóraǵasy Qadyrhan Otarovtyń aıtýynsha, Elbasy tapsyrmasyn iske asyrý maqsatynda úsh jylǵa (2012-2014 j) josparlanǵan 90 mln. gektardyń 31 mln. gektardy qamtıtyn aýyl sharýashylyǵy maqsatyndaǵy jerge túgendeý júrgizilgen.
«Osy jyly júrgiziletin túgendeýdiń maqsaty olardyń kólemderiniń eseptik derektermen sáıkes kelýin naqtylaý ǵana emes, olardyń jaǵdaıyn zertteý, ıaǵnı paıdalanylmaǵan nemese maqsatqa saı emes paıdalanylyp kelgen jer ýchaskelerin anyqtaý. Sondaı-aq, sýarmaly aımaqtar, jaıylymdardyń jaǵdaıyn aıqyndap, tıimdi paıdalaný jónindegi usynystardy ázirleý bolyp tabylady. Bul rette túgendeý jumystary 57 ákimshilik aýdandy jáne 5 oblystyq mańyzdaǵy qalany qamtydy. 800 aýyldyq (selolyq) okrýg jáne 67,5 myń sharýashylyq sýbektileri zertteldi», - deıdi agenttik basshysy. Onyń aıtýynsha, shara aıasynda tıisti kartografııalyq jáne basqa da qajetti materıaldar daıyndalǵan. Soǵan oraı, túgendeý júrgizýdiń barysynda agrarlyq sektordaǵy sharýashylyq júrgizý sýbektilerdiń sanyna qatysty aıyrmashylyqtar anyqtalǵan.
«Bul rette atap ótýimiz kerek, jyl saıynǵy jer balansyn ázirlegende, olar jergilikti atqarýshy organdarmen bekitiledi. Osy tusta árbir aýytqýlar túzetiletin bolady jáne ol statıstıkalyq organdarǵa beriledi. Alaıda osyndaı úlken aıyrmashylyqtardyń bolýy jyl saıynǵy esepti ázirleýge keıbir ýákiletti organdardyń tııanaqsyz jumysyn kórsetedi», - deıdi Qadyrhan Otarov.
