3 mln-ǵa jýyq oqýshy jazǵy demalysyn lagerde ótkizedi

ASTANA. KAZINFORM –  Bıyl jazǵy demalyspen 2 939 028 bala qamtyldy, dep habarlaıdy QR Oqý-aǵartý mınıstrliginiń baspasóz qyzmeti. 

Elimizde 10 743 demalys ornynda 2,9 mln bala jazǵy demalysyn ótkizedi. Onyń ishinde 10 myń bala – jyl boıǵy saýyqtyrý ortalyqtarynda, 240 myń bala – maýsymdyq, 2,6 mln bala – mektep janyndaǵy, 75 myń bala – shatyrly jáne kıiz úıli demalys oryndarynda demalady.

«Jazǵy demalyspen, saýyqtyrýmen jáne eńbekpen 1-10 synyp oqýshylarynyń 92%-y, ıaǵnı áleýmettik osal sanattaǵy 600 myńǵa jýyq balany qosa alǵanda, barlyǵy shamamen 2,9 mln bala qamtylady dep josparlanyp otyr. Demalys oryndarynda balalardyń qaýipsizdigi erekshe baqylaýda. 187 demalys ortalyǵynyń 150-i 1-10 maýsym aralyǵynda iske qosylýda. Al qalǵan 37 demalys nysany óz jumysyn 15 maýsymnan bastaıdy», - delingen mınıstrliktiń habarlamasynda.

Esterińizge salsaq, buǵan deıin Qoǵamdyq saıasat ınstıtýty júrgizgen saýalnamada ata-analardyń 10,1%-y ǵana balalaryn demalysqa lagerge jiberýdi josparlap otyrǵanyn aıtqan edi.

Buǵan deıin Premer-Mınıstr balalardyń jazǵy demalysyn uıymdastyrý jumystaryn synǵa alǵan bolatyn. Oljas Bektenovtiń aıtýynsha, balalardyń jazǵy demalysy tıisti deńgeıde uıymdastyrylmaıdy, kóbinese esep berý úshin atústi júrgiziledi.

Sondaı-aq, Premer-Mınıstr eń aldymen áleýmettik jaǵynan osal sanattaǵy balalardy jazǵy demalyspen qamtý kerek dep, jaýapty mınıstrlikterge tapsyrma bergen. 

Qalamqas Nysanbaı