3 myńnan astam adam dárigerge júgindi: Túrkistanda janýarlardan zardap shekkender kóbeıgen
TÚRKІSTAN. KAZINFORM – Bıyl alty aıda óńirde janýarlar shabýylyna tap bolǵandar sany artqan. Bul týraly Túrkistan oblysy sanıtarııalyq-epıdemıologııalyq baqylaý departamentiniń basshysy Nurbek Nyshanov brıfıngte málimdedi.
Onyń aıtýynsha, jyl saıyn óńirde 6 myńǵa jýyq adam ıtter men basqa janýarlardan zardap shegip, medıtsınalyq kómek alady.
– Janýarlardyń tisteýi men qutyrýdyń aldyn alý boıynsha jyldyń alǵashqy alty aıynda 3302 adam medıtsınalyq kómekke júgindi. Bul ótken jyldyń sáıkes kezeńimen salystyrǵanda 7,8 paıyzǵa kóp, – dedi spıker.
Departament basshysynyń málimetinshe, Túrkistan oblysynda jyl basynan beri Qyrym-Kongo gemorragııalyq qyzbasynyń 8 rastalǵan jaǵdaıy tirkelgen. Onyń ekeýi Otyrar aýdanynda, bir-birden Báıdibek, Ordabasy, Qazyǵurt, Saıram, Keles aýdandary men Kentaý qalasynda anyqtalǵan. Ótken jyldyń osy kezeńimen salystyrǵanda aýrýshańdyq 2 jaǵdaıǵa artqan.
– Túrkistan oblysy – ońtústik óńirdegi Qyrym-Kongo gemorragııalyq qyzbasynyń tabıǵı oshaqtary ornalasqan tórt oblystyń biri. Infektsııany juqtyrý qaýpi negizinen mal sharýashylyǵymen aınalysatyn azamattar arasynda joǵary. Bıyl alty aıda mamandar 31 myńnan astam kene jınap, zertteý júrgizdi. Nátıjesinde 55 synamadan aýrý qozdyrǵyshy anyqtaldy, – dedi spıker.
Sondaı-aq oblysta jarty jylda týberkýlezdiń alǵash anyqtalǵan 266 jaǵdaıy tirkeldi. Onyń ishinde 16-sy – balalar men jasóspirimder.
Buǵan deıin Túrkistan oblysynda 1400-ge jýyq adamdy kene shaqqanyn jazǵan edik.
