3 myńǵa jýyq fermer kóktemgi egis jumystaryna qarjy aldy
ASTANA. KAZINFORM – Aýyl sharýashylyǵy taýaryn óndirýshiler úshin syıaqynyń túpkilikti mólsherlemesi jyldyq 5% deńgeıinde belgilengen. Bul týraly AShM baspasóz qyzmeti habarlady.
2026 jylǵy maýsymdaǵy kóktemgi dala jumystaryn erte qarjylandyrý baǵdarlamasyn iske asyrý belsendi túrde jalǵasyp jatyr. Baǵdarlama boıynsha ótinimderdi qabyldaý 2025 jylǵy qazanda bastalǵan bolatyn. Aýyl sharýashylyǵy taýaryn óndirýshiler úshin syıaqynyń túpkilikti mólsherlemesi jyldyq 5% deńgeıinde belgilengen.
— Búgingi kúni 519 mlrd teńge somasyna 3534 aýyl sharýashylyǵy taýaryn óndirýshiden ótinimder pýly qalyptastyryldy. Qazirgi ýaqytta 3 mln gektardan astam egis alqabyn qamtı otyryp, 288 mlrd teńge somasyna 2936 ótinim qarjylandyryldy, — delingen AShM habarlamasynda.
Sonymen qatar, «Damý» qory arqyly qaryzdardy kepildendirý tetigi iske asyrylyp jatyr. Bul nesıe somasynyń 85%-yna deıin kepildik berýge múmkindik beredi. Qazirgi ýaqytta 111,5 mlrd teńge somasyndaǵy qaryzdar boıynsha 753 kepildik berilgen.
«Keń dala 2» baǵdarlamasy boıynsha ótinimderdi qabyldaý ótken jyldyń 1 qazanynda Memleket basshysynyń kóktemgi dala jumystaryn ýaqtyly ári sapaly júrgizýdi qamtamasyz etý jónindegi tapsyrmasyn oryndaý aıasynda bastaldy.
Qarjylandyrýdyń erte bastalýy sharýalarǵa 2026 jylǵy egis naýqanyna aldyn ala daıyndalýǵa múmkindik beredi. Qarajat janar-jaǵarmaı materıaldaryn tıimdi baǵamen satyp alýǵa, mıneraldy tyńaıtqyshtar alýǵa, aýyl sharýashylyǵy tehnıkasyn jóndeýge jáne qajetti tuqym qoryn qalyptastyrýǵa baǵyttalady.
Jeńildetilgen qarjylandyrý kóktemgi dala jumystaryn daıyndaý men júrgizýge ǵana emes, sonymen qatar oraq naýqanyna jáne maýsymdyq shyǵyndardy qarjylandyrýǵa da qoljetimdi.
Aıta ketelik 7 jylda Qazaqstandaǵy aýyl sharýashylyǵy óndirisi kólemi eki esege jýyq artty.
