3 myńǵa jýyq ákimshilik hattama: azyq-túlik naryǵynda deldaldar qanshalyqty azaıdy
ASTANA. KAZINFORM — Osy jyly azyq-túlik bazarlarynda taýar ótkizý tizbekterindegi tıimsiz deldaldardy qysqartýda qandaı ońtaıly nátıje boldy? Bul suraqqa Saýda jáne ıntegratsııa mınıstrligi jaýap berdi.
Azyq-túlik taýarlarynyń túpkilikti qunyna áser etetin faktorlardyń biri — jetkizý tizbegindegi ónimsiz deldaldardyń bolýy. Mundaı áreketterdi anyqtaý jáne olardyń jolyn kesý maqsatynda el óńirlerinde azyq-túlik taýarlaryna baǵa belgileý tizbegindegi deldaldyq shemalardy tekseretin komıssııalar jumys isteıdi.
— Qazirgi kezde deldaldyq shemalardy tekserýmen aınalysatyn óńirlik komıssııalar 614 otyrys ótkizip, nátıjesinde zań buzýdyń 2 436 deregin anyqtady. Bul rette 2 908 ákimshilik hattama toltyrylyp, jetkizý tizbeginen 211 deldal shyǵaryldy, — delingen mınıstrliktiń Kazinform agenttigine bergen jaýabynda.
Aıta keteıik, Qazaqstanda áleýmettik mańyzy bar azyq-túlik taýarlary (ÁMAT) naryǵynda ónimsiz deldaldardy anyqtaýǵa múmkindik beretin jańa quqyqtyq tetik engiziledi.
Buǵan deıin habarlanǵandaı, óńirlerdegi baǵa jaǵdaıyna eleýli yqpal etetin 63 negizgi bazar aıqyndaldy. Atalǵan nysandarda kóshpeli tekserýler, monıtorıng jáne túsindirý jumystary júrgizilip jatyr.
