3 myń rýbık tekshesinen Abaı portreti qurastyryldy
ASTANA. KAZINFORM - Astanadaǵy MEGA Silk Way saýda, oıyn-saýyq ortalyǵynda Abaı Qunanbaıulynyń 180 jyldyǵyna oraı erekshe ınstallıatsııa usynyldy – uly aqynnyń portreti 3000 Rýbık tekshesiniń kómegimen jasaldy.
Ortalyq eki kún boıy «Abaı álemi» atty mazmundy mádenı is-sharalar alańyna aınaldy. Kópshilik nazaryna shyǵarmashylyq qoıylym men poezııalyq keshter usynyldy.
Aýqymdy jobalardyń biri – Rýbık tekshelerinen quralǵan alyp portret boldy. Bıiktigi 3 metr, eni 2 metr biregeı týyndyny spıdkýber jastar nebári 5 saǵat ishinde jınap shyqty.
«Biz tek kórneki ınstallıatsııa emes, tereń maǵynasy bar art-obekt jasaýdy kózdedik. Rýbık tekshesi – logıka men shyǵarmashylyqty toǵystyratyn óner. Osy arqyly kórermenge ulttyq bolmysty zamanaýı tásilmen jetkizgimiz keldi, – dedi jobanyń bastamashysy Álıhan Ertursyn.
Kórkem týyndyny myńdaǵan kelýshi tamashalap, jastardyń kreatıvti oılaý qabileti men ónerine oń baǵasyn berdi. Installıatsııa tek shyǵarmashylyqty emes, ulttyq muraǵa degen qurmetti de aıqyn kórsetti.
Uıymdastyrýshylardyń aıtýynsha, bul – Abaı murasyn jańasha qyrynan tanytýǵa jasalǵan tyń qadam. Maqsat – shyǵarmashylyqty damytý, ulttyq sana men eldik bolmysty jastardyń tereńirek uǵynýyna sebepker bolý.
Osyǵan deıin Abaı oblysynda «Abaı kúni» qalaı atap ótilip jatqany týraly fotoreportaj jarııaladyq.