3 mıllıonǵa jýyq azamatqa 42 500 teńge tóleýden nelikten bas tartyldy

NUR-SULTAN. QazAqparat - 3 mıllıonǵa jýyq adamǵa 42 500 teńge áleýmettik tólem tóleýden bas tartyldy. Onyń sebepterin Ortalyq kommýnıkatsııalar qyzmetindegi brıfıngide QR Eńbek jáne halyqty áleýmettik qorǵaý mınıstri Birjan Nurymbetov túsindirip berdi, dep habarlaıdy QazAqparat tilshisi.

«Biz 3 mıllıonǵa jýyq adamnyń ótinishinen bas tarttyq. Osyǵan qatysty da saýaldar túsip jatqandyqtan túsindire keteıin. Birinshisi, jeke sáıkestendirý nómirin durys kórsetpegen. 12 tsıfrdy jańylyspaı, tııanaqty túrde durys kórsetkenderińiz jón. Sebebi JSN-di teksergende sizdiki emes, basqa adamdiki bolyp shyǵýy múmkin. Sondyqtan mundaı qatelerdi túzetip, qaıta jiberý kerek. 160 myńdaı adam osyndaı qate jibergen», - dedi mınıstr.

Onyń aıtýynsha, ekinshiden, bankterdiń rekvızıtterine, esepshottarǵa qatysty da kóp másele týyndap jatyr. ıAǵnı, azamattar ótinish bergen kezde KZ dep bastalatyn 20 tsıfrdy kórsetý qajet.

«Keıbireýler kartalarynyń 16 tsıfrly nómirin kórsetedi. Biz banktegi sizdiń 20 tsıfrly esepshotyńyzǵa, al bank kartańyzǵa aýdaryp beredi. Osy rette sizderdiń esepshottaryńyzdy qalaı tekseretindigimizdi túsindirip bereıin. Ótinish kelgende banktik esepshotyńyzdyń 20 tsıfrly ma ekendigin tekseremiz. 19 san bolsa durys emes. KZ degennen keıingi sandar qaı banktegi esepshot ekenin kórsetedi. Eger ol jabylyp qalǵan bank bolsa, onda ótinishterińizdi keri qaıtaryp jatyrmyz. 20 sany túgel bolsa tólem taǵaıyndaýǵa jiberemiz», - dedi ol.

Mınıstrdiń dereginshe, dál osy jerde taǵy bir problemalar týyndap otyr.

«Tólem taǵaıyndalǵannan keıin 1 jumys kúniniń ishinde sizder kórsetken esepshotqa qarajatty aýdaramyz. Biraq, osy kúnderi 800 myńnan astam adamnyń aqsha aýdarylǵan esepshotynan bank bizge keri qaıtaryp jiberdi. Sóıtsek, sizderdiń bergenderińiz ol bankterde jabylyp qalǵan esepshottaryńyz eken. Sodan keıin sol banktegi qoldanystaǵy basqa esepshottaryńyzǵa aýdaryp berdik. Munan bólek, 70 myń adamnyń ol bankte 20 tsıfrly esepshoty bolmaı shyqty. Sondyqtan sizderge «basqa, durys bank esepshotyn kórsetińizder» degen SMS jiberiledi», - dedi Birjan Nurymbetov.

Sonymen qatar, mınıstr úshinshiden memlekettik qyzmetshilerdiń, jabylmaǵan mekemelerdiń qyzmetkerleriniń ótinishteri keri qaıtarylyp jatqandyǵyn aıtty.

«Memlekettik organdarǵa, uıymdarǵa 42 500 teńgeniń qatysy joq. Sebebi olardyń jumystary shektelgen joq. Olar qashyqtan jumys istep jatyr. Sondyqtan memlekettik qyzmetshilerdiń ótinish tóleý, biryńǵaı jıyntyq tólem tóleýi qajet emes. Tipti, memlekettik qyzmetkerge BJT tóleýge bolmaıdy. Sebebi BJT tólegen adam kásipkerlikpen aınalysatyndyǵyn bildiredi. Al memlekettik qyzmetkerge kásipkerlikpen aınalysýǵa bolmaıdy», - dedi Eńbek mınıstri.

Onyń atap ótýinshe, zeınetkerler men múgedekterdiń de ótinishteri keri qaıtarylyp jatyr. Jalpy, bul sanattaǵy adamdar tótenshe jaǵdaıǵa deıin resmı túrde jumys istep, áleýmettik tólemder aýdarylsa, al qazir tabysynan aıyrylsa ǵana 42 500 teńge beriledi.

«Tórtinshiden, ótinishi keri qaıtarylǵan 1 mıllıonnan astam adamnyń sońǵy 12 aıda Memlekettik saqtandyrý qoryna áleýmettik tólemderi tólenbegen. Mundaı tólem negizgi shart bolǵannan keıin ótinishterdi keri qaıtarýǵa májbúrmiz. Sońǵysy qaıtys bolyp ketken adamdardyń nemese shetelge kóship ketip, sol jaqta turyp jatqan adamdardyń atynan da ótinish berilip jatyr», - dedi ol.