3 mıllıon 400 myń teńge qaryzdan qutylý úshin ishki ister organdaryna qaraqshylyq shabýyl jasaldy degen jalǵan aqparat beripti
ASTANA. Aqpannyń 17-si. QazAqparat /Aıdar Ospanalıev/ - Qaryzǵa belshesinen batqan jaýapkershiligi shekteli seriktestikterdiń biri ishki ister organdaryna ózderine qaraqshylyq shabýyl jasaldy dep shaǵymdanyp, qaryzdarynan qutylmaq bolypty.
Bul oqıǵa jóninde búgin jýrnalıstermen bolǵan brıfıntge Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń aıtýynsha, aqpannyń 16-sy kúni tańǵy saǵat 11-de Aqmola oblysynyń Іshki ister departamentiniń jedel basqarý ortalyǵyna er azamat telefon shalyp, Kókshetaý qalasynyń ortalyq bazary mańynda, naqtyraq aıtqanda Gagarın kóshesinde belgisiz bireýlerdiń onyń kóligine oq atqanyn jetkizgen. «Al oqıǵa ornyna kelgen tártip saqshylaryna jaýapkershiligi shekteýli seriktestiktiń atqarýshy dırektory, 25 jasar azamat seriktestikten bankke qarjy tasymaldap bara jatqan kezinde onyń kóliginiń aldyńǵy terezesine oq atylyp, osy sátte júrgizýshi basyn uryp alyp es-tússiz qalǵandyǵyn aıtty. Al kóliktegi 3 mıllıon 400 myń teńge iz-tússiz kózden ǵaıyp bolǵan», dedi departament bastyǵy.
Onyń málimetterine qaraǵanda, atalmysh oqıǵaǵa júrgizilgen tekserý jumystary oq atylǵan kóliktiń terezesinde jaryqtardy kóredi. Tekserý jumystarynyń aldyn ala nátıjeleri boıynsha kóliktiń terezesine oq denege zaqym keltiretin qarýdan atylǵan. «Sonymen qatar kóliktiń júrgizýshisi qaraqshylyq shabýyl jasalǵanyna qaramastan tergeý barysynda ózin erekshe baısaldy, beıqam ustady. Al shabýyl jasaǵan kóliktiń markasyn bilmeıtin bolyp shyqty. Eń sońynda jedel basqarý ortalyǵynyń benekameralary shabýyl jasalǵan kóliktiń qozǵalysyn árbir mınýtyna deıin túsirgen. Onda eshqandaı da shabýyldyń kórinisi joq. Al seriktestik dırektorynyń aıtqandary múldem shyndyqqa janaspaıdy. Tártip saqshylary sonymen qatar JShS-niń moınynda úlken qaryzy bar ekendigin anyqtady. Sóıtip qaraqshylyq shabýyl qaryzdan qutylý úshin oıdan shyǵarylǵan dúnıe bolyp shyqty», dedi Q.Jumanov.
