3 mamyrda jel kúsheıip, birqatar óńirde 7 gradýsqa deıin qatqaq bolady

ASTANA. QazAqparat - Qazgıdromet sınoptıkteri 3 mamyr, sársenbige arnalǵan aýa raıy boljamyn jarııalady, dep habarlaıdy QazAqparat.

Aýqymdy antıtsıklon áserinen Qazaqstan aýmaǵynyń basym bóliginde jaýyn-shashynsyz aýa raıy saqtalady.

Alaıda Ońtústik tsıklon jáne oǵan ilesip keletin fronttarǵa baılanysty eldiń batysynda, ońtústik-batysynda jańbyr jaýady, naızaǵaı jarqyldap, burshaq jaýady.

Keı ýaqytta qatty jańbyr jaýady, elimizdiń ońtústik-shyǵysy men shyǵysynda jaýyn-shashyn (jańbyr, qar) jaýady.

Respýblıka boıynsha jel kúsheıedi, ońtústikte, ońtústik-shyǵysta, batysta shańdy daýyl soǵady, soltústikte, soltústik-shyǵysta – tuman túsedi.

Túnde Almaty, Jetisý oblystarynyń taýly aýdandarynda, Qostanaı oblysynyń soltústiginde, ońtústik-shyǵysynda, Ulytaý oblysynyń shyǵysynda, Jambyl oblysynyń taýly aýdandarynda 1-7 gradýsqa deıin úsik júredi.