3 qyzylordalyq kongo-qyrym bezgegin juqtyrý kúdigimen aýrýhanaǵa tústi
QYZYLORDA. QazAqparat - Qyzylorda oblysynda kongo-qyrym qandy bezgegin juqtyrdy degen kúdikpen úsh azamat aýrýhanaǵa jatqyzyldy, dep habarlaıdy QazAqparat tilshisi.
Byltyr kene shaqqan 500 adamnyń 6-y KQQB kúdikti dep aýrýhanaǵa jatqyzyldy. Bıyl 437 adam esepke alynyp, onyń 3-i emdeý ornyna ornalastyryldy.
«Kongo-qyrym qandy bezgegi boıynsha kúdigi bar barlyq 3 adam da kenemen tikeleı baılanysta boldy. Ekeýi egistikte jumys isteıdi, bireýi mal ósirýmen aınalysady. Birinshi jaǵdaı Jalaǵash aýdanynyń Aqsý aýylynda tirkeldi. Qazir naýqastyń jaǵdaıy qanaǵattanarlyq. Naýqaspen baılanysqan adamdar medıtsınalyq baqylaýǵa alyndy jáne eshqandaı belgiler tabylǵan joq. Odan keıingi ekinshi jaǵdaı Shıeli aýdanynyń Dosbol bı aýylynda oryn aldy. Qazirgi ýaqytta onyń jaǵdaıy turaqty, naýqastan alynǵan saraptamalar jaqsy kórsetkishte, qaýip joq. Naýqaspen baılanysqan jeti adam baqylaýǵa alyndy, barlyǵy 14 kúnge deıin turaqty baqylaýda bolady.
Úshinshi jaǵdaı da Shıeli aýdanynyń Dosbol bı aýylynda qaıtalanyp tur. Naýqas keshe qabyldanǵan, joǵary temperatýrada jalpy jaǵdaıy jaqsy. Tańerteń alǵashqy saraptamanyń nátıjeleri alyndy, saraptamasy teris boldy. Ekinshi jáne úshinshi saraptamanyń aralyǵy bes kún bolady. Tek 3 synamanyń teris nátıjesnen keıin dárigerler dıagnozdy ózgertedi»,-dedi Qyzylorda oblysy taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Alııa Ábdiqaıymova.
«Barlyq 123 eldi mekendegi 488 myńnan astam mal basyna jáne kólemi 2 042 998 sharshy metrdi quraıtyn 32 512 qora men aýmaǵy 680 048 sharshy metr 1 192 sýat pen shańlaqqa kóktemgi zalalsyzdandyrý jumystaryn júrgizý bekitilgen kestege sáıkes 8 sáýir kúni bastalyp, 12 maýsym kúni aıaqtaldy»,- dedi Qyzylorda oblystyq jumyldyrý daıyndyǵy basqarmasy basshysynyń orynbasary Ǵabıt Jańabaev.
Aıta ketsek, Qyzylorda oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń málimetine sáıkes, bıyl oblys aýmaǵynda Kongo-qyrym qandy bezgeginiń qozdyrǵyshy bolyp tabylatyn keneden qolaısyz aımaq retinde 123 eldi meken anyqtalǵan. Osyǵan baılanysty oblystyq bıýdjetten kóktemgi jáne kúzgi zalalsyzdandyrý jumystaryn júrgizý úshin 214,0 mln teńge qarjy bólinip, memlekettik satyp alý konkýrsy jarııalanyp, 4 merdiger mekeme anyqtaldy.
