3 qyrkúıek. Týǵan kún ıeleri
ESІMDER
89 jyl buryn (1929) fılologııa ǵylymdarynyń doktory, professor, ádebı synshy, Qazaqstannyń eńbek sińirgen mádenıet qyzmetkeri, QR Memlekettik syılyǵynyń laýreaty ELEÝKENOV Sherıazdan Rústemuly dúnıege keldi.
Shyǵys Qazaqstan oblysynda týǵan. Qazaq memlekettik ýnıversıtetin bitirgen. Jýrnalıstik jáne ǵylymı-pedagogıkalyq qyzmetpen aınalysty. 1971-1986 jyldary Memlekettik baspa, polıgrafııa, jáne kitap saýdasy komıtetiniń tóraǵasy. 1986-1988 jyldary - Ádebıet jáne óner ınstıtýtynyń dırektory, 1988-1996 jyldary - osy ınstıtýttyń orys ádebıeti bóliminiń meńgerýshisi, aǵa ǵylymı qyzmetker, oǵan qosa Ál-Farabı atyndaǵy QazUÝ professory.
«Qazaq romany jáne qazirgi dáýir», «Zamandas parasaty», «Folklordan roman-epopeıaǵa deıin», «Maǵjan» sııaqty ǵylym eńbekterdiń, «Kitaptaný negizderi», «Gazet janrlary», «Qazaq kitabynyń tarıhy» jáne basqa da oqýlyqtardyń avtory.
«Qurmet belgisi» ordenimen, kóptegen medaldarmen marapattalǵan.
79 jyl buryn (1939-1991) qazaq qypshaqtanýshysy, ǵalym-arheolog AQYNJANOV Serjan dúnıege keldi.
Almaty qalasynda týǵan. Máskeý memlekettik ýnıversıtetin bitirgen. Qazaq KSR Ǵylym akademııasynyń Sh.Ýálıhanov atyndaǵy Tarıh, arheologııa jáne etnografııa ınstıtýtynda qyzmet istedi.
S.Aqynjanov «Qypshaqtar men olardyń HІ - HІІІ ǵasyrdyń basyndaǵy Horezmmen ózara saıası qatynastary» degen taqyrypta kandıdattyq dıssertatsııa qorǵaǵan. Otandyq tarıh, arheologııa, ejelgi jáne orta ǵasyrlardaǵy Qazaqstan mádenıetine arnalaǵan elýden astam ǵylymı eńbek jazdy. «Ortaǵasyrlyq Qazaqstan tarıhyndaǵy qypshaqtar» atty qypshaqtardyń qoǵamdyq qurylysy, memlekettik qurylymdary men mal sharýashylyq túrleri jónindegi kólemdi eńbegi jaryqqa shyqty. Ońtústik Qazaqstan keshendi arheologııa ekspedıtsııasyna, Shúlbi, Ońtústik Qazaqstan arheologııalyq ekspedıtsııalaryna, sondaı-aq Qazaqstan arheologııasy tarıhynda tuńǵysh qurylǵan qazaq-amerıkan halyqaralyq arheologııalyq-etnografııalyq ekspedıtsııasyna jetekshilik etti. Sh.Ýálıhanov atyndaǵy Tarıh, arheologııa jáne etnografııa ınstıtýtynyń arheologııalyq tehnologııa zerthanasyn basqarǵan.
70 jyl buryn (1948-2014) Fızıka-matematıka ǵylymdarynyń doktory, professor, QR Injenerlik jáne Halyqaralyq ınjenerlik akademııasynyń akademıgi, QR Memlekettik syılyǵynyń laýreaty DANAEV Narǵozy Tursynbaıuly dúnıege kelgen.
Jambyl oblysy Talas aýdany Maıtóbe aýylynda dúnıege kelgen. 1972 jyly QazMÝ-dy (qazirgi QazUÝ) támamdaǵan.
KSRO Ǵylym Akademııasynyń Sibir bólimshesi esepteý ortalyǵynda stajer-zertteýshi (1972-1974), sonda aspırant (1974-1977), aǵa ınjener (1977-1982). QazMÝ-dyń aǵa oqytýshysy, dotsenti (1982-1995), QazMÝ-dyń janyndaǵy Matematıka jáne mehanıka ınstıtýtynyń dırektory (1995-1997, 2000 jyldan). QazMÝ-da dekan (1997-2000) boldy. Negizgi ǵylymı-zertteý jumystary esepteý matematıkasyna, sondaı-aq suıyqtyq, gaz jáne plazma mehanıkasyna arnalǵan. QR Memlekettik syılyǵynyń laýreaty (1994).
67 jyl buryn (1951) «Oraldyń «Zenıt» zaýyty» AQ bas dırektory VALIEV Vıacheslav Hamzauly dúnıege keldi.
Oral qalasynda týǵan. Lenıngrad keme jasaý zaýytyn úzdik bitirgen, ınjener-elektr mehanıgi. Arnaıy tehnıkalar boıynsha ónertabystary bar. 1968 jyly K.E. Voroshılov atyndaǵy mashına jasaý zaýytynda (2003 jyldan - «Oraldyń «Zenıt» zaýyty» AQ) jumysshy. 1975 jyldan - ınjener-konstrýktor, jetekshi ınjener-konstrýktor, mehanıkalyq buıymdar sektorynyń bastyǵy, bólim bastyǵynyń orynbasary, bastyǵy, 1988 jyldan - bas konstrýktor, 1989 jyldan І dárejeli Otan soǵysy ordendi K.E.Voroshılov atyndaǵy mashına jasaý zaýytynyń dırektory. 1991 jyldan - «Zenıt» zaýytynyń dırektory. 1994 jyldan «Oral «Zenıt» zaýyty» AAQ prezıdenti. 2001 jyldan - «Oral «Zenıt» zaýyty» AAQ bas dırektory.
«Qurmet» (2005), ordenimen, «Eńbektegi erligi úshin» (1985), «Astana» (1998), «Qazaqstan Respýblıkasynyń táýelsizdigine 10 jyl» (2001) medaldarymen, «І dárejeli «Shekara áskeri úzdigi» (2005), «Qurmetti mashına jasaýshy» (2006), tósbelgisimen, «Reseıdiń sýasty kúshteri qýatyn qurýdaǵy jeke úlesi úshin» halyqaralyq kúmis eskertkish belgisimen, (2006). marapattalǵan. QR Qurmetti ınjeneri (2005).
58 jyl buryn (1960) Qazaqstan Respýblıkasy Parlamenti Májilisi Tóraǵasynyń hatshylyǵy meńgerýshisiniń orynbasary, Qazaqstan Respýblıkasy Prezıdenti ókildiginiń Qazaqstan Respýblıkasy Parlamentindegi bas ınspektory - YSQAQ Ákim Ábdihaıymuly dúnıege keldi.
Ońtústik Qazaqstan oblysy Ordabasy aýdany Bórjar aýylynda týǵan. Shymkent pedagogıka ınstıtýtynyń fızıka jáne Almaty memlekettik ýnıversıtetiniń zań fakýltetin bitirgen. 1980 jyldan ózi oqyǵan Abaı atyndaǵy orta mekteptiń muǵalimi, 1990 jyly Bógen aýdandyq partııa komıtetiniń ıdeologııa bóliminiń nusqaýshysy, respýblıkalyq «Lenınshil jas» (qazirgi «Jas Alash») gazetiniń Qyzylorda, Shymkent, Jambyl oblystaryndaǵy menshikti tilshisi. 1991 jyly halyq depýtattary Shymkent oblystyq keńesiniń baspasóz hatshysy, 1992 jyldan Ordabasy aýdany bilim bóliminiń meńgerýshisi bolǵan. 1995 jyly jeltoqsanda balamaly negizde Qazaqstan Respýblıkasy Parlamenti Májilisiniń depýtaty bolyp saılandy. 1999-2004 jyldary Qazaqstan Respýblıkasy Prezıdenti Ákimshiligi uıymdastyrý-baqylaý bóliminiń memlekettik ınspektory. jaýapty qyzmetkeri, 2004 jyly «Otan» partııasy ortalyq apparatynyń keńesshisi bolǵan.
Qazirgi qyzmetinde - 2004 jyldyń sáýirinen beri.
Qazaqstan parlamentarızminde tuńǵysh qazaq tilinde, ári Úkimetke balamaly negizde jazylǵan «Halyqtyń kóshi-qony týraly» zańynyń avtory. Balalarǵa arnalǵan «Kotlet» atty tuńǵysh syqaq áńgimesi 1977 jyly «Qazaqstan pıoneri» (qazirgi «Ulan») gazetinde basylǵan. 1989 jyly Samarqandta ótken Orta Azııa jáne Qazaqstan jastary óner jáne poezııa festıvaliniń laýreaty, respýblıkalyq «Jiger» festıvaliniń dıplomanty (1985), S.Erýbaev atyndaǵy Shymkent oblystyq Jastar syılyǵynyń laýreaty (1992). «Abzaldyq álippesi» atty kitaby birqatar ýnıversıtetter men mektepterde pán retinde oqytylýda. Qazaqstan Jýrnalıster odaǵy syılyǵynyń laýreaty. 1997 jyly «Jyl adamy» ataǵyn alǵan. Fılosofııalyq tálim-tárbıege negizdelgen «Júrektegi jazýlar», «Adam izdep júrmin» atty esse-kitaptary jaryq kórgen. Kóptegen ánderdiń avtory. «Kóńil qymbat» (2008), «Dosyma» (2009) atty án-albomdary, «Júrektegi jazýlar» atty DVD jınaǵy jaryqqa shyqqan. Shyǵarmalary orys, ózbek, túrikmen tilderine aýdarylǵan. Ordabasy aýdanynyń Qurmetti azamaty. «Eren eńbegi úshin», «Astanaǵa 10 jyl», «Qazaqstan Respýblıkasy Parlamentine 10 jyl», «Astana» medaldarymen, Qazaqstan Respýblıkasy Prezıdentiniń Alǵys hatymen, Qazaqstan Respýblıkasy Parlamenti Senatynyń Qurmet gramotasymen marapattalǵan. Mońǵolııanyń «Shyńǵyshan» medaliniń ıesi. Qazaqstan Respýblıkasy Bilim berý isiniń úzdigi.
56 jyl buryn (1962) «A.N.Syzǵanov atyndaǵy ulttyq ǵylymı hırýrgııa ortalyǵy» AQ basqarma tóraǵasy BAIMAHANOV Bolatbek Bımendiuly dúnıege keldi.
Qyzylorda qalasynda dúnıege kelgen. Almaty medıtsına ınstıtýtynyń emdeý fakýltetin (1986) hırýrg mamandyǵy boıynsha, T. Rysqúlov atyndaǵy Qazaq ekonomıkalyq ýnıversıtetiniń ekonomıka fakýltetin (2006) ekonomıka bakalavry mamandyǵy boıynsha támamdaǵan. Medıtsına ǵylymdarynyń doktory (2001). Professor (2006 jyldan). 1986 jyldan - Qyzylorda oblystyq aýrýhanasynyń dáriger-hırýrgi, 1987 jyldan - endoskopıst-dárigeri. 1990 jyldan - A.N. Syzǵanov atyndaǵy Klınıkalyq jáne synaqtyq ǵylymı-zertteý ınstıtýtynyń ǵylymı qyzmetkeri, 1991 jyldan - hırýrgııa bóliminiń ǵylymı qyzmetkeri, 1995 jyldan - Almatydaǵy hırýrgııa bóliminiń aǵa ǵylymı qyzmetkeri. 2000 jyldan - Ońtústik Qazaqstan oblystyq densaýlyq saqtaý basqarmasynyń bastyǵy. 2002 jyldan - Ońtústik Qazaqstan oblystyq densaýlyq saqtaý departamentiniń bastyǵy. 2003 jyldan - «A.N. Syzǵanov atyndaǵy hırýrgııa ǵylymı ortalyǵy» RMKK dırektory, 2007 jyldan bólim meńgerýshisi (Almaty q.). 2008 jyldyń shildesinen - Qyzylorda oblysy Densaýlyq saqtaý basqarmasynyń bastyǵy. 2011 jyldan «Respýblıkalyq jedel medıtsınalyq járdem ǵylymı ortalyǵy» AQ-nyń Basqarma tóraǵasy. 2012 jyldan bastap Almaty qalasyndaǵy №7 qalalyq klınıkalyq emhananyń bas dárigeri.
Qazirgi qyzmetinde - 2016 jyldyń aqpan aıynan bastap.
«Qurmet» ordenimen (2006), «Qazaqstan Respýblıkasynyń táýelsizdigine 10 jyl» (2001), «Astananyń 10 jyldyǵy» medaldarymen, «Densaýlyq saqtaý isiniń úzdigi» belgisimen marapattalǵan.
42 jyl buryn (1976) «Eır Astana» áýe kompanııasynyń josparlaý boıynsha atqarýshy dırektory ALIGÝJINOVA Alma dúnıege keldi.
«Bolashaq» baǵdarlamasy boıynsha AQSh-tyń Shyǵys Karolına ýnıversıtetin bitirip, MVA - Іskerlik uıymdastyrý magıstiri dárejesin alǵan.
Ol 2001 jyldan bastap, kompanııanyń qurylǵan kezinen beri, ushýlar oryndalmastan buryn jumys istep kele jatyr. Eńbek jolyn kompanııada korporatıvti qatynastardy damytý máselesimen aınalysatyn menedjer qyzmetinen bastady. Keıinirek korporatıvti qatynastardy damytý máselesimen aınalysatyn dırektor qyzmetine taǵaıyndaldy. «Eır Astana» AQ Strategııalyq jáne kommertsııalyq josparlaý jónindegi aǵa vıtse-prezıdenti boldy.
32 jyl buryn (1986) sportshy, Qazaqstannyń eńbek sińirgen sport sheberi, erkin kúresten Qazaqstannyń 4 dúrkin chempıony, Olımpıada júldegeri, birneshe dúrkin halyqaralyq birinshilikterdiń jeńimpazy TAŃATAROV Aqjúrek Dostyquly dúnıege keldi.
Ol Jambyl oblysy Taraz qalasynda dúnıege kelgen. 2012 jyly Londondaǵy Jazǵy Olımpıada oıyndarynda 66 kg salmaq dárejesinde Qazaqstannyń namysyn qorǵap, qola júldeger atandy.
143 jyl buryn (1875-1951) avstrııalyq ınjener, nemistiń «Folksvagen» avtomobılin jasaýshy PORShE Ferdınand dúnıege keldi.