3 kúnniń ishinde kóshi-qon zańnamasyn buzǵandarǵa 1 mln. 500 myń teńge aıyppul salyndy
ASTANA. QazAqparat - Quqyqtyq tártipti qamtamasyz etý, Qazaqstan Respýblıkasyna zańsyz keletin adamdardy anyqtaý men zańsyz kóshi-qon arnalary men olardy uıymdastyrýshylardyń jolyn kesý maqsatynda 3-5 jeltoqsan aralyǵynda Kóliktegi ІІD qyzmet kórsetý aýmaǵynda «Mıgrant» jedel- aldyn alý is-sharasy ótkizildi.
Іs-sharaǵa kún saıyn barlyǵy 600-ge jýyq qyzmetker jumyldyrylyp, jedel qyzmet, ákimshilik polıtsııasy jáne kóshi-qon polıtsııasy qyzmetkerleriniń qatarynan 51 utqyr top quryldy, dep habarlaıdy Kóliktegi ІІD baspasóz qyzmeti.
Shara barysynda Qazaqstan Respýblıkasyna kelý erejesin buzǵandary úshin 215 sheteldik QR ÁQBK 394-baby boıynsha ákimshilik jaýapkershilikke tartyldy, onyń ishinde 153-i TMD azamattary, 62-i alys shetel azamattary. Sondaı-aq, sottyń sheshimimen 1 sheteldik Qazaqstan Respýblıkasy aýmaǵynan tysqary shyǵaryldy.
QR ÁQBtK 395-baby, ıaǵnı jeke nemese zańdy tulǵalardyń Qazaqstan Respýblıkasynda sheteldikterdiń bolý qaǵıdalaryn buzýy boıynsha 6 quqyq buzýshylyq anyqtalyp, jeke basyn kýálandyratyn qujattary joq taǵy da 6 sheteldik qabyldaý-taratý oryndaryna jetkizildi.
Іzdeýde júrgen 3 qylmysker ustaldy. Sonymen qatar, kóshi-qon zańnamasyn buzǵan 3 qylmys boıynsha QR QK 330-babynyń 1-tarmaǵymen (QR memlekettik shekarasyn qasaqana zańsyz ótkeni úshin), QR QK 330-1 babymen (Tysqary shyǵarý týraly sot sheshimin oryndamaǵy úshin) jáne QR QK 330-2 babyna (Zańsyz kóshi-qondy uıymdastyrǵany úshin) sáıkes tekserý amaldary júrgizilýde.
Jalpy, is-shara ótkizilgen 3 kún ishinde kóshi-qon zańnamasyn buzǵandarǵa 1 mln. 500 myń teńge kóleminde aıyppul salyndy. Qazirgi ýaqytta kólik polıtseıleri kóshi-qon zańnamasynyń tártibin saqtaýdy qamtamasyz etý maqsatynda qosymsha sharalar qabyldaýda.
