3 qyrkúıek. Kazinform kúntizbesi. Jylnama
Kazinform oqyrman nazaryna 3 qyrkúıekke arnalǵan ataýly kúnder men este qalar oqıǵalar kúntizbesin usynady.
Qazaq tazysy men tóbeti kúni
Úkimettiń qaýlysymen 2026 jyldan bastap 3 qyrkúıek Qazaq tazysy men tóbeti kúni bolyp belgilendi. Tazy men tóbet – qazaqtyń baıyrǵy ıt tuqymdary, qazaq halqynyń maqtanyshy jáne qazaq halqynyń jeti qazynasynyń biri. Tazy ıt – ańshynyń ajyramas serigi, al tóbet – tórt túliktiń qorǵanyshy. Bul tuqymdar bizdiń tarıhymyzben baılanysty, olardyń shyǵý tegi ǵasyrlardan bastaý alady. Bul kún osy tuqymdardyń tarıhyna, erekshelikterine jáne kútimine arnalǵan dárister, semınarlar, kórmelermen jáne is-sharalarmen qatar júredi.
ESTE QALAR OQIǴALAR
1998 jyly QR Prezıdentiniń Jarlyǵymen Almaty oblysy Qaskeleń aýdanynyń ataýy Qarasaı aýdany bolyp ózgerdi.
2007 jyly jańa Qazaqstannyń tarıhynda tuńǵysh ret barlyq qazaqstandyq oqýshylar úshin «Jańa Qazaqstan – jańa álemde» ınteraktıvti sabaǵy ótkizildi. Onlaın rejımde ótken sabaqqa respýblıka boıynsha myń mektep qatysty.
2009 jyly QR Prezıdentiniń Jarlyǵymen Aqmola oblysynyń Şýche aýdany Býrabaı aýdany dep ózgertildi.
2010 jyly «Eýrosport» telearnasy Qazaqstannyń tabysty jas sportshylary týraly «Jas úmit» telejobasyn iske qosty. Onyń maqsaty – Qazaqstannyń sporttyq áleýetin kórsetý, sonymen qatar tsıkldy baǵdarlamalar arqyly osy eldiń mádenıeti men qundylyqtary jóninde maǵlumat berý.
2012 jyly Esentýkı Kavkaz mıneraldy sýlary tobyna kiretin Reseıdegi eń iri jáne tanymal emdik sýy men balshyqpen emdeıtin kýrortynda tolyq jańartylǵan «Qazaqstan» sanatorııi ashyldy.
2013 jyly Qazaqstan halyq sýretshisi Áýbákir Ysmaıylovtyń júz jyldyǵyna oraı úsh tilde (qazaq, orys, aǵylshyn) «Álem kóshpendi boıaýynda» atty kitap-albomy jaryq kórdi. Budan bólek, sýretshi otbasynyń nusqaýymen reseılik sarapshylardy tarta otyryp, derekti fılm túsirildi. 30 mınýttyq fılmde qylqalam sheberiniń taǵdyry, óner joly sóz boldy.
2021 jyly Qostanaıda qazaq jýrnalıstıkasynyń damýyna baǵa jetpes úles qosqan jazýshy-jýrnalıst Ábilfaıyz Ydyrysovqa arnalǵan memorıaldyq taqtanyń ashylýy ótti. Ǵalym retinde ol tek dáris oqyp qana qoımaı, sonymen qatar osy salada teńdesi joq oqýlyqtar jazdy.
2021 jyly Túrkııada «Qazaqfılm» kınostýdııasynda shyǵarylǵan «Tomırıs» kórkem fılmi prokatqa shyqty. Kórsetilim búkil el boıynsha 200-den astam kınoteatrda ótti. Uly dala patshaıymy týraly kartınany kórsetý quqyǵyna Amerıka, Ulybrıtanııa, Italııa, Ispanııa, Japonııa, Taıaý Shyǵys, Ońtústik Koreıa, TMD, Sıngapýr, Rýmynııa jáne Frantsııa elderiniń dıstrıbıýtorlary ıe boldy.
2024 jyly Astanadaǵy Syǵanaq kóshesi, 1 mekenjaıyndaǵy úıdiń qabyrǵasynda bıiktigi 40 metr, 480 sharshy metr qabyrǵa sýreti paıda bolǵan. Mýral «Taza Qazaqstan» ekoaktsııasyna arnalǵan.
2024 jyly Halyqaralyq kınologııalyq federatsııa (FCI) «Qazaq tazysy» ıt tuqymyn resmı túrde aldyn ala taný týraly sheshim qabyldap, Qazaqstannyń tuqym standartynyń ıegeri mártebesin bekitti.
2025 jyly astanada brıtandyq ýnıversıtettiń kampýsy ashyldy. Saltanatty rásimge ǵylym jáne joǵary bilim mınıstri Saıasat Nurbek, bilim mınıstri Ǵanı Beısembaev, Ulybrıtanııanyń Qazaqstandaǵy elshisi Sallı Aksvortı jáne ýnıversıtet basshylyǵy qatysty. Kampýs ınformatıka, bıznes basqarý, qurylys ınjenerııasy, geologııa jáne paıdaly qazbalardy barlaý mamandyqtary boıynsha bakalavrıat baǵdarlamalary boıynsha 315 stýdentti qabyldaýdy josparlap otyr. Oqytý aǵylshyn tilinde júrgiziledi.
