3 qańtarda respýblıka boıynsha qaı joldarda qozǵalys shekteldi

ALMATY. KAZINFORM — «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, 2026 jylǵy 3 qańtar kúni saǵat 08:00–degi jaǵdaı boıynsha, aýa raıynyń qolaısyzdyǵyna baılanysty respýblıkalyq mańyzy bar kelesi avtojol ýchaskelerinde júk jáne qoǵamdyq kólik túrleri úshin qozǵalys shekteldi:

Aqtóbe oblysy

• «Qandyaǵash — Embi — Shalqar — Yrǵyz» avtojolynyń 3-257-shaqyrymy (Qandyaǵash qalasy — Shalqar qalasy);
• «Aqtóbe — Qandyaǵash — Dossor — Atyraý — RF shekarasy» avtojolynyń 104-337-shaqyrymy (Qandyaǵash qalasy — Atyraý oblysynyń shekarasy).

Atyraý oblysy

• «Aqtóbe — Qandyaǵash — Dossor — Atyraý — RF shekarasy» avtojolynyń 337-346-shaqyrymy (Aqtóbe oblysynyń shekarasy — Saǵyz aýyly).

Sondaı-aq tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde qys aıaqtalǵansha saqtalady.

Jabyq joldar

Aýa raıynyń kúrt buzylýyna baılanysty 2026 jylǵy 2 qańtar saǵat 21:45–ten bastap Aqtóbe oblysynda barlyq kólik túrleri úshin qozǵalys jabyldy:

• «RF shekarasy — Mártók — Aqtóbe — Qarabutaq — Qyzylorda — Shymkent — Taraz — Qordaı — Almaty — Qorǵas — QHR shekarasy» avtojolynyń 776-965-shaqyrymy (EKO oıl janarmaı quıý stantsııasy — Qarabutaq kenti).

Al «Astana — Shiderti — Pavlodar — Ýspenka — RF shekarasy» avtojolyndaǵy jolaıryqtyń kópir qurylymynyń shetki arqalyqtary zaqymdanýyna baılanysty «Qalqaman» jolaıryǵy ýchaskesi jabyldy. Atap aıtqanda, Qalqaman kentine kireberis pen Astana baǵytyna shyǵatyn jol ýaqytsha jabyq.

Eske salaıyq, buǵan deıin sınoptıkter aldaǵy kúnderi Qazaqstan aýmaǵy arqyly Jerorta teńizi aımaqtarynan kelgen tsıklon ótetinin, osyǵan baılanysty respýblıkanyń kóp bóliginde qar jaýyp, boran soǵatynyn eskertken edi.