3 qańtarda Qazaqstannyń tórt qalasynda aýa sapasy nasharlaıdy
ASTANA. QazAqparat - Sársenbi, 3 qańtar kúni meteorologııalyq jaǵdaı elimizdiń tórt qalasynda atmosferada lastaýshy zattardyń shoǵyrlanýyna yqpal etedi, dep habarlaıdy QazAqparat.
«Qazgıdromet» RMK-nyń málimetinshe, Kókshetaý, Óskemen qalalarynda aýa sapasynyń nasharlaıtyny kútiledi. Sondaı-aq kúndiz Taldyqorǵanda, Qaraǵandyda jaǵymsyz meteojaǵdaılar saqtalady.
Qolaısyz meteorologııalyq jaǵdaılar - atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy. QMJ jaǵdaıynda eldi mekenderdegi atmosferalyq aýanyń sapasy nasharlaýy yqtımal.
