3 qalada jylý kózderin jańǵyrtý úshin 25 mlrd teńge bólinedi

ASTANA. KAZINFORM — Elimizdiń úsh qalasyndaǵy jylý kózderin jańǵyrtý úshin 25 mlrd teńge bólinedi. Bul týraly QR Premer-mınıstri Oljas Bektenov aıtty.

— Osy aıda men Astana, Kókshetaý, Rıdder jáne Qyzylorda qalalaryndaǵy jylý kózderin jańǵyrtý úshin rezervten 25 mıllıard teńge bólý týraly qaýlyǵa qol qoıdym. Úkimet osy qarajattyń tıimdi jumsalýyn jáne odan alynǵan nátıjeni baqylaıtyn bolady, — dedi ol Úkimet otyrysynda. 

Sondaı-aq Oljas Bektenov qazirdiń ózinde keıbir óńirlerde jumystardyń keshiktirý qaýpi baıqalyp otyrǵanyn atap ótti. 

— Máselen, Semeı qalasynda qazandyqtardy jóndeý jumystary áli bastalǵan joq. Mańǵystaý oblysynda «MAEK-tiń» 2-shi Jylý ortalyǵyndaǵy týrbınany jóndeý tıisti jumys tájirıbesi joq qurylys kompanııasyna berilgen. Qostanaı oblysynda Rýdnyı jylý elektr ortalyǵyndaǵy týrbınany jóndeý 10-shy sáýirden beri bastalǵan joq. Arqalyq jylý stantsııasyndaǵy qazandyq boıynsha da osyndaı jaǵdaı qalyptasyp otyr. Ulytaý oblysy Sátbaev qalasyndaǵy qazandyqtardy jóndeý jumystarynyń qarqyny da tym baıaý. Mundaı kemshilikter óńirlerdiń bárinde derlik kezdesedi, — dedi Úkimet basshysy.