3 birdeı qaqpashy penaltı qaıtardy — «Qaırat» qaqpashylar sheberhanasyna aınalyp keledi
ASTANA. KAZINFORM — Dastan Sátbaevtyń oıynyn búkil Anglııa baqylap otyrdy. Bul týraly fýtbol sarapshysy aıtty.
«Qaırat» pen «Real Madrıd» arasyndaǵy kezdesý kesheli beri kúlli fýtbolsúıer qaýymnyń ortaq taqyrybyna aınaldy. Búkil álem almatylyq klýbtyń jas oıynshylary týraly áńgime etip jatyr.
Al Jibek Joly telearnasynyń «Búgin LIVE» stýdııasyna qonaq bolǵan Rymbek Іzǵalı «Qaırat» oıynshylarynyń eń basty qateligin atady.
— Bizdiń jigitter birinshi taımda jaqsy oınady. Ekinshi taım, ókinishke qaraı, sátsiz boldy. Bul «Qaırattyń» zańdylyǵy. Buǵan deıin de «Sportıngpen» bolǵan oıyndarda kóp gol jiberip qoıyp júrdi ǵoı. Aldaǵy ýaqytta «Qaıratta» áli de oıyndar kóp. Olar — Qazaqstandaǵy demalmaıtyn jalǵyz komanda. Mysaly, qarasha aıynda barlyq qazaqstandyq klýbtar demalysqa ketse, tek «Qaırat» Chempıondar lıgasyndaǵy oıynyn qańtar aıyna deıin jalǵastyra beredi. Osy ekinshi taımynyń máselesin sheshý úshin olarda áli ýaqyt kóp. Ol úshin bapkerlik shtabty aýqymdy jumys kútip tur dep aıtýǵa bolady, — deıdi stýdııa qonaǵy.
«Qaırat» — «Real Madrıd» oıyny ne berdi?
«Qaırat» óz alańynda ıspanııalyq klýbqa edáýir aıyrmashylyqpen ese jiberse de, jankúıerlerdiń kóńili kóterińki. Qoldaýshylar elimizdiń túpkir-túpkirinen oıynshylarǵa alǵysyn aıtyp, sáttilik tilep jatyr. Kóbi «Qaırat» jeńilse de, «Qazaqstan jeńilgen joq» dep fılosofııalyq pikirlerin jazǵan.
Al sarapshy bul máselege qatysty mynadaı pikir bildirdi.
— Men negizinen pragmatık ári perfektsıonıst adammyn. Kez kelgen nátıjede pálsapalyq áńgimelerdi toqtaýsyz aıta berýge bolady. Biraq men ony syltaý dep qabyldaımyn. Al sportta bul bolmaıdy. Meniń oıymsha, Qazaqstandaǵy fýtbolǵa qatysy bar adamdar, onyń ishinde bapkerler, balalar bapkerleri, elimizdegi ózge klýbtardyń bapkerleri men oıynshylar «Qaırattyń» deńgeıimen ózderin salystyrdy dep oılaımyn. Sebebi olar buǵan deıin «Qaıratpen» oınady. Utyp júrgen komandalar da bar. Olar ózderin «Qaırattyń» oıynshylarynyń ornyna qoıady. «Men myna jerde ne ister edim?», «Meniń deńgeıim qandaı?» degen sııaqty ózderine baǵa bere alatyndaı sabaq boldy dep oılaımyn, — deıdi ol.
Rymbek Іzǵalı qazaqstandyq oıynshylar fızıkalyq daıyndyqty kúsheıtý kerek deıdi.
— Joǵaryda ekinshi taımdaǵy álsiz oıyn týraly aıttym ǵoı. Bul — fızıka. Oıynshylar ekinshi taımda sharshap qaldy. Al fızıka degenimiz — durys tamaqtaný, ýaqytyly jatý syndy tártipter. Endi bapkerler kishkentaı balalarǵa deıin fızıkalyq daıyndyqty kúsheıtedi degen úmittemin. Bul, árıne, ózderińiz aıtpaqshy, Qazaqstan fýtboly úshin qosar úlesi kóp tájirıbe, — dedi maman.
Sarapshynyń pikirinshe, osy oıynnan keıin Qazaqstanda fýtbol mádenıeti jańa deńgeıge kóterilýi kerek.
— Fýtbolda usaq-túıek degen nárse joq. Mysaly, keshe «Real Madrıd» kelip, bir qonaq úıdi túgeldeı jaldap aldy. Bul klýbtyń óz oıynshylaryna qurmet kórsetip, qalaı jaǵdaı jasaıtynyn kórsetedi. Bul — biz úshin úlken sabaq bolý kerek. Biz «Real Madrıdtiń» Anglııada basqa klýbtarmen oınap jatqanyn estisek te, ondaǵy jańalyqtardy oqysaq ta, elemeımiz. Al bizdiń úıimizge, elimizge kelip, kórsetip ketse, tájirıbe alarlyqtaı úlgi bolady, — deıdi Rymbek Іzǵalı.
Stýdııa qonaǵy keshe ótken baspasóz jıynyna da toqtaldy.
— Odan bólek, baspasóz konferentsııasyn uıymdastyrǵanda da jýrnalıstermen kóp jumys jasaldy. Óıtkeni, keshe kórgenderińizdeı, baspasóz jıynynda Prezıdent kezdesýlerindegideı avtomatty aýdarmamen jumys istedi. Al bizde ádette mundaı protsess uzaq bolady. Ol kisiniń qoıǵan suraǵyn aldymen aǵylshynshaǵa, keıin qaıtadan qazaqshaǵa aýdaryp otyratyn. Bul — meniń baıqaǵanym. Al barǵan áriptesterimiz de biraz nárse aıtatyn bolar dep oılaımyn, — deıdi sarapshy.
Demek, Qazaqstanǵa madrıdtik «Realdyń» kelýi tek fýtbolǵa áserin tıgizgen joq. Bul, eń aldymen, qazaqstandyq klýbtar úshin aýqymdy tájirıbe. El ekonomıkasyna tıgizgen paıdasyn esepke almaǵanda, servıs, BAQ jáne fýtbolshylardyń daıyndyǵyna da serpilis bereri anyq.
Baq pen bap: Oıynshylar týraly
Qaqpashy Sherhan Qalmurza keshe 7 ret seıv jasap, juldyzǵa aınaldy. 18 jasar oıynshynyń Instagram paraqshasyna 1 kúnde 150 myńnan asa oqyrman jazylǵan. «Qaırat» klýbynyń 3-shi qaqpashysyn «Real Madrıd» golkıperi Tıbo Kýrtýa óz paraqshasynda belgiledi.
— Qaırattyń sońǵy ýaqyttary jıi baǵy janyp júr. Mysaly, «Seltıkpen» oıynda Zarýtskıı jaraqat alyp qaldy da, ornyna Anarbekov shyqty. Temirlan kelesi matchqa shyǵyp, 4 penaltı qaıtardy. Bul penaltılerdi Zarýtskıı qaıtara alar ma edi? Bul — úlken suraq. Óıtkeni, Anarbekov — «Qaırattyń» túlegi. «Sportıngke» qarsy matchta Sherhan Qalmurza da penaltı qaıtardy. Oǵan qosa, jasóspirimder arasynda da chempıonat bar. Keshe «Qaırat» pen «Real Madrıd» jasóspirimderi oınaǵan matchta «Qaırattyń» qaqpashysy taǵy bir penaltı qaıtardy. Demek, bul — olardyń mektebi, akademııasy jaqsy jumys isteıdi degen sóz, — deıdi Rymbek Іzǵalı.
Sarapshy Sherhan Qalmurzanyń oıynyna baǵa berdi.
— Eýropada 18 jasar fýtbolshy jas bolyp eseptelmeıdi. Onda 20 jasar oıynshylar — tolyqtaı qalyptasqan fýtbolshylar. Qalmurzanyń keshegi oıynynan áli de tájirıbe jetpeıtini kórinip turdy. Keıbir jerlerde sasqalaqtap qalǵany da baıqaldy. Qaqpashy úshin boı da kerek. Eger biz Qazaqstan deńgeıinde alar bolsaq, 7 seıv — óziniń jasy men Qazaqstandaǵy bizdiń deńgeıimiz úshin óte joǵary. Biraq, bizde qazir chempıonattyń aıaǵy. «Qaırat» klýby chempıonattyń basynan bastap kez kelgen stsenarııge daıyn bolý kerek edi. ıAǵnı, keı oıyndarda Sherhan Qalmurzany táýekelge baryp, shamalap shyǵaryp turý kerek edi. Bul da — tájirıbe ǵoı, — deıdi ol.
Al Dastan Sátbaev bul básekede óziniń jaqsy oıynshy ekenin taǵy bir ret kórsete aldy.
— Dastan Sátbaev óte jaqsy oınady. Soqqylar jasady. Oǵan qosymsha jaýapkershilik bar. Óıtkeni, ony «Chelsıdiń» skaýttary qarap otyr ǵoı. Onyń oıynyn baqylap, baǵa beredi. Anglııadaǵy BAQ ókilderi de mindetti túrde jazady. Jalpy, óte jaqsy oınady. Biraq fýtbol — komandalyq oıyn. Bir oıynshynyń jarqyldap kózge túsýi eshteńeni sheshpeıdi, — deıdi maman.
Rymbek Іzǵalı keshegi oıyndaǵy taǵy bir erekshelikke toqtaldy.
— Meniń oıymsha, álemdik sarapshylardyń bári Sátbaev, Qalmurza syndy jas oıynshylardy kóbirek aıtýy múmkin. Odan bólek, keshe baıqasańyzdar, «Qaırat» akademııasynyń túlekteri kóp oınady. Eýropadaǵy kez kelgen klýbty alyp qarasańyz, tipti «Real Madrıdtiń» ózi «Bizdiń 5 birdeı túlegimiz oınap jatyr» dep maqtana almaıdy. Jalǵyz maqtanatyn klýb — «Atletık Bılbao» men «Seltık» shyǵar. Biraq kóp klýb legıonerlerden quralǵan, — deıdi sarapshy.
Al áleýmettik jelide qazaqstandyqtar alańda otyryp, oıyn tamashalaǵan jankúıerlerge narazylyǵyn bildirip jatyr. Aıtýlarynsha, olar jetkilikti deńgeıde qoldaý kórsete alǵan joq.
— Jankúıerlerdiń qoldaýy — ýaqytpen keletin nárse. Mundaı úlken fýtbol matchtary jıi bolyp tursa, mádenıet te qalyptasady. Adamdardy uıymdastyrýdyń ózi ońaı dúnıe emes. Men joǵary fýtbol mádenıeti qalyptasatynyna senemin. Óıtkeni, «Qaırat» neshe jyldan beri birinshi ret chempıon bolyp tur. Chempıon bola sala Chempıondar lıgasynyń toptyq kezeńine shyǵyp tur. Bul — klýbtyń ishki jumysy durys baǵytta degen sóz. Endi ekinshi baǵyty — jankúıerlermen jumys. Bul jaǵynan jankúıerler de sabaq alyp jatqan shyǵar dep oılaımyn, — dep túıindedi Rymbek Іzǵalı.
Aıta keteıik, áleýmettik jelilerde Almatydaǵy «Qaırat» pen madrıdtik «Real» arasyndaǵy Chempıondar lıgasynyń ekinshi týr oıynyna baılanysty pikir kóbeıdi. Match aıaqtalǵanymen, oǵan qatysty daý-damaı basylmaı tur: ondaǵan jankúıer bıleti bolsa da, stadıonǵa kire almaǵanyn aıtty.