3 balany órtten qutqarǵan polıtseı: Ondaı kezde oılanatyn ýaqyt bolmaıdy
RIDDER. QazAqparat – Shyǵys Qazaqstan oblysy Rıdder qalasynda jalyn sharpyǵan jer úıden qarshadaı 3 bala shyǵa almaı qalǵan. Taǵdyrdyń jazýynan bolsa kerek, dál osy kezde sol mańaıda júrgen polıtsııa qyzmetkeri Ivan Nazarov lezde kómekke umtylady. Syn saǵatta batyl qımyldaǵan tártip saqshysy búldirshinderdi kórpege orap, syrtqa shyǵarǵan. Osylaısha, ustaranyń ushynda qalǵan 3 balǵyn anasymen qaıta qaýyshty. QazAqparat tilshisi Qazaqstan polıtsııasy kúnine oraı beıbit kúnniń batyry Ivan Nazarovpen suhbattasqan bolatyn.
- Áńgimemizdiń álqıssasyn osy salaǵa qalaı kelgenińizden bastasaq.
- Men 1984 jyly Glýbokoe aýdanynda dúnıe esigin ashtym. Bala kúnimnen polıtsııa qyzmetkeri bolýdy armandaıtynmyn. 2003 jyly mektep qabyrǵasynan túlep ushqannan keıin áskerı boryshymdy Shymkent qalasynda ótedim. Sodan beri osy salada ter tógip kelemin dese de bolady. 2012 jyly «Zańger» mamandyǵy boıynsha joǵarǵy oqý ornyn syrttaı bitirdim. Qazir Rıdder qalalyq polıtsııa bóliminde jedel ýákil bolyp qyzmet etýdemin. Áskerı shenim – kapıtan.
- Tótenshe jaǵdaı kezinde, ıaǵnı 20 sáýir kúni úsh balany órtten qutqaryp qaldyńyz. Sol oqıǵanyń egjeı-tegjeıin baıandap berseńiz.
- Sol kúni kezekshilikte bolyp, kóshelerdi patrýldep júrgen edim. Tańǵy saǵat 05.00 shamasynda Internatsıonalnyı kóshesindegi jer úılerdiń birinde ot shyqqanyn baıqap qalyp, birden sonda attandym. Kelsem sharýashylyq qora-jaıda tutanǵan qyzyl jalyn úıge jaıylyp ketipti. Syrtta áıel adam tur. Eseńgiregen ol ne bolǵanyn da túsindire almady. Bir ýaqytta «Úıde balalar qalyp qoıdy» dedi. Estı sala kidirmesten júgire jóneldim. Órtengen úıdiń ishi tútinge tolyp, kórý múmkindigi nasharlap ketken. Áıteýir tórgi bólmege jetsem qarshadaı 3 bala otyr eken. Onyń ekeýin kórpege orap kóterip aldym da jasy úlkendeý kóringen úshinshisine «Sońymnan erip otyr» dedim. Sóıtip, tórteýmiz aman-esen syrtqa shyqtyq. Bári qas-qaǵym sátte boldy. Búldirshinderdi qyzmettik kóligime otyrǵyzyp, qaıta kelsem, úıge kirý múmkin emes. Laýlaǵan tilsiz jaý odan saıyn kúsheıe túsken.
- Sonda sál keshikseńiz balalardy qutqara almaı qalar ma edińiz?
- Iá. Bálkim birneshe mınýtqa keshiksek bári kesh bolar ma edi... Shynymdy aıtsam, órttiń qanshalyqty qaýipti ekenin osy kezde kórdim. Meniń ornymda bolǵan kez kelgen adam osylaı ister edi dep oılaımyn. Sálden soń oqıǵa ornyna órt sóndirýshiler kelip jetti.
- Osy erligińiz úshin sizge qandaı da bir marapat berildi me?
- Óskemen qalasyna shaqyrylyp, Shyǵys Qazaqstan oblystyq polıtsııa departamentiniń basshysy Saǵat Mádıevtiń qolynan madaqtama qaǵazyn aldym. Sonymen qatar Qazaqstan polıtsııasy kúnine oraı QR Іshki ister mınıstri Erlan Turǵymbaevtan «Erligi úshin» medali berildi. Alaıda men sol bir syn saǵatta kózge túsip, marapat alý úshin emes, balalardyń ómiri úshin áreket ettim. Ondaı kezde oılanatyn ýaqyt bolmaıdy eken. Qandaı da bir qıyndyqqa tap bolǵan adamdarǵa kómektesý ol polıtsııa qyzmetkeriniń boryshy.
- Sizdiń oıyńyzsha, quqyq qorǵaý organy qyzmetkeriniń boıynda qandaı qasıetter bolýy kerek?
- Birinshi kezekte batyldyq qajet. Ózine senimdi bolyp, qandaı jaǵdaı bolmasyn aqyl tarazysyna salyp, durys sheshim qabyldaı alǵany jón. Turǵyndardyń suraqtaryna jiti jaýap berý úshin zańdy búge-shúgesine deıin bilý mindet. Halyqtyń bizge artqan senimin túsinip, moınymyzǵa júktelgen jaýapkershilikti sezinip jemqorlyq degen báleden aýlaq bolý kerek. Mine sonda ǵana shendi abyroımen taǵa alamyz. Ár tártip saqshysy eliniń naǵyz patrıoty bolyp, halyqtyń qamy úshin ter tógýi qajet dep esepteımin.
- Otbasyńyz jaıly aıtyp ótseńiz.
- Áıelim ekeýimiz 3 bala tárbıelep otyrmyz. Eki qyzym men bir ulym bar. Kenje ulym bıyl 2-ge tolady. Kúndiz-túni jumysta bolǵandyqtan otbasymdy sırek kóretinim ras. Árıne, saǵynasyń. Zaıybym qyzmetime túsinistikpen qaraıdy. Úıge kelgende ylǵı dastarhan jaıyp, jyly shyraımen qarsy alady. Qudaıǵa shúkir, mamandyq tańdaǵanda da, jar tańdaǵanda da qatelespeppin.
- Koronavırýs pandemııasyna baılanysty óńirimizde karantın jarııalanǵany belgili. Qazirgi ýaqytta qalaı jumys istep jatyrsyzdar?
- Juqpaly derttiń jaıylýyna jol bermes úshin turǵyndar arasynda túsindirý jumystaryn júrgizýdemiz. Toı-tomalaq, merekelik sharalar ótkizýge áli erte. Sebebi adam kóp jınalatyn jerlerde vırýs odan saıyn órshı túsýi múmkin. Maska kıip, jeke bas gıgıena sharalaryn qatań saqtaý kerek. Bul árqaısymyzǵa qatysty. Ózimizdiń, otbasymyzdyń densaýlyǵyna jaýapty ekenimizdi sezineıik.
