3 aıda brakonerlikke baılanysty 31 qylmystyq is qozǵalǵan

NUR-SULTAN. QazAqparat – Jyldyń alǵashqy 3 aıynda brakonerlikke baılanysty qozǵalǵan 31 qylmystyq istiń ishinde kıik atý faktileri de bar. Bul jaıynda QR ІІM Ákimshilik polıtsııa komıteti profılaktıkalyq qyzmet basqarmasynyń tabıǵat qorǵaý polıtsııasy tobynyń ınspektory Álisher Jarmaǵambetov aıtty, dep habarlaıdy QazAqparat tilshisi.

«Tabıǵat qorǵaýshy polıtsııa qyzmetkerleri jyldyń 3 aıynda 2507 ákimshilik jáne 31 qylmystyq quqyq buzý faktisin tirkedi. Árıne, zańdy qataıtýdyń áseri bar. Biraq eń áýeli qoǵam sanasyna ózgeris kerek. Mektep qabyrǵasynan bastap tolerantty urpaq tárbıeleýge kúsh salynýy qajet. Tek sonda ǵana polıtsııa qyzmetkerleri qoǵammen, belsendi azamattarmen birlesip brakonerliktiń betin qaıtaryp, keleshek urpaqqa saý ekojúıeni, jasyl Qazaqstandy qaldyra alamyz», - dedi ІІM ókili onlaın brıfıngide.

Sondaı-aq, ol jyl basynan beri tirkelgen óreskel faktilerge toqtaldy.

«Mysaly, kıikterge joıylyp ketý qaýpi tónip tur. 2 aqpan kúni Qaraǵandy oblysynda 1992 jylǵy jigit tizgindegen kólik ustaldy. Tintý kezinde kólikten 844 múıiz tabylyp, QR Qylmystyq kodeksiniń 339-baby boıynsha kúdikti ýaqytsha ustaý ızolıatoryna qamaldy. Al 5 naýryzda Qostanaı oblysyndaǵy erekshe qorǵalatyn aımaqta qaban atqan brakoner ustaldy. Bul fakt boıynsha 337-bap («Zańsyz ańshylyq») boıynsha tergeý sharasy taǵaıyndaldy», - dedi Álisher Jarmaǵambetov.

QR ІІM Ákimshilik polıtsııa komıteti basqarmasy basshysynyń orynbasary Jasulan Jumanalınnyń málimeti boıynsha, bıyl elimizde balalardyń qatysýymen 400-den astam jol-kólik oqıǵasy tirkelgen.