3 aı kúttirgen Dımashtyń fanattary Aqtóbege kelmeıdi
«EKSPO-2017» halyqaralyq kórmesi aıasynda qytaılyq týrıster Aqtóbege kelip, ánshi Dımash Qudaıbergenniń týǵan jerine saıahat jasaýy tıis edi. Ánshiniń anasy Svetlana Aıtbaeva oblystyq máslıhat sessııasy kezinde týrıstik marshrýttyń ázirligin suraǵan bolatyn.
Al Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly 2 myń týrıst kelýge usynys jasaǵanyn aıtyp, ishki týrızmdi damytyp júrgen fırmaǵa arnaıy marshrýt ázirleýdi tapsyrdy. Týrmarshrýtqa Dımash Qudaıbergen oqyǵan orta mektep, mýzykalyq kolledji men oblystyq fılarmonııa kirdi.
Úsh aı boıy qytaılyq áriptesterinen habar kútken jergilikti týrıstik fırma Dımash Qudaıbergenge arnalǵan marshrýtty toqtatyp, ishki týrızmge baǵyttalǵan jumystaryn jandandyrdy.
«Dımash Qudaıbergenge arnalǵan týrıstik marshrýt arnaıy daıyndaldy. Úsh aı kúttik. Qytaılyq áriptesterden habar bolmady, endi týrısterdiń kelmeıtini belgili boldy. Qazirgi kezde ishki týrızmdi damytý baǵytyn qaıta qolǵa aldyq. Yrǵyz, Baıǵanın aýdandaryna baramyz»,- dedi «Zere týr» týrıstik fırmasynyń dırektory Botagóz Krambaeva.
Aıta keteıik, qytaılyq týrıster keledi dep daıyndalǵan jergilikti bılik arnaıy gıd-ekskýrsovodtardy da daıyndady. Qytaı tilin biletinder basqa aımaqtardan habarlasyp, óz qyzmetterin usyndy.
