3 aı ishinde Qazaqstanda 17 mln. tonnadan astam munaı óndirildi
ASTANA. 15 sáýir. QazAqparat - QR Statıstıka agenttiginiń málimeti boıynsha aǵymdaǵy jyldyń qańtar-naýryz aralyǵynda Qazaqstanda 17,3 mln. tonna munaı óndirildi.
Bul ótken jyldyń sáıkes kezeńimen salystyrǵanda 2,5 paıyzǵa artyq.
«QazMunaıgaz» kompanııasynyń resmı saıtyndaǵy aqparatqa qaraǵanda, 2013 jyldyń birinshi toqsanynda elimizde gaz kondensatyn óndirý 2,2 paıyzǵa artyp, 3,27 mln. tonnany quraǵan. Sonymen qatar 30,6 mln. tonna kómir óndirildi. Bul ótken jyldyń sáıkes kezeńimen salystyrǵanda 3,1 paıyzǵa kem.
Buǵan deıin elimizdiń Munaı jáne gaz mınıstrligi 2016 jylǵa deıin munaı jáne gaz kondensatyn óndirý boljamyn tómendetken bolatyn. Qazaqstan 2013 jyly 82 mln. tonna, 2014 jyly 83 mln. tonna, al 2015 jyly 90 mln. tonna munaı jáne gaz kondensatyn óndirýdi josparlaýda. Sondaı-aq osy jyly 40,5 mlrd. tekshe metr, 2014 jyly 41 mlrd. tekshe metr, 2015 jyly 45 mlrd. tekshe metr gaz óndirý mejelengen.
