3 áskerı jáne TJD-nyń birneshe mamanymen baılanys bolmaı tur – Qorǵanys mınıstri

NUR-SULTAN. QazAqparat – Jambyl oblysynda áskerı bólimdegi jarylystan keıin 3 áskerı qyzmetshimen jáne tótenshe jaǵdaılar departamentiniń birneshe mamanymen baılanys bolmaı tur. Bul týraly QR Qorǵanys mınıstri Nurlan Ermekbaev málim etti, dep habarlaıdy QazAqparat tilshisi.

«Áskerı bólimde birneshe áskerı qyzmetshini jáne áskerılendirilgen kúzetti qosa alǵanda 135 adam qyzmet etedi. Olardyń basym bóligi kelisimshart boıynsha áskerı qyzmetshiler sanalady. Shamamen 15 ofıtser bar. Ol jerde qatardaǵy jaýyngerler joq. Biz ázirshe úsh áskerı qyzmetshimen baılanysa almaı otyrmyz. Sonymen qatar tótenshe jaǵdaılar departamentiniń birneshe mamany joǵaldy», - dedi mınıstr Jambyl óńirlik kommýnıkatsııalar qyzmetindegi baspasóz máslıhaty barysynda.

Esterińizge sala ketsek, keshe saǵat shamamen 19:00-de Jambyl oblysynyń Baızaq aýdanynda ornalasqan áskerı bólim qoımalardyń biri órtenip, artynan joıqyn jarylys boldy. Qazirgi ýaqytta onnan astam jarylys bolǵany málim etildi. Sonymen qatar 4 áskerı qyzmetshi qaza tapqan.