3 aqpannan bastap Astanada qardy tazalaýǵa úsh myńnan astam jumysshy jumyldyryldy
ASTANA. KAZINFORM – Elordada kommýnaldyq qyzmetter qys bastalǵaly beri kúsheıtilgen rejımde jumys istep keledi. Boran men aıazǵa qaramastan, qaladan qar táýlik boıy, úzdiksiz shyǵarylyp jatyr, dep habarlaıdy elorda ákimdiginiń resmı saıty.
Ótken túnde qala aýmaǵynan arnaıy qar polıgondaryna 1 929 reıspen shamamen 30 myń tekshe metr qar shyǵaryldy.
3 aqpan tańerteńnen bastap qalany qardan tazalaý jumysyna 3 myńnan astam jol jumysshysy men 1 600-den asa arnaıy tehnıka tartyldy.
Jalpy, qys mezgili bastalǵaly beri elordadan qar polıgondaryna 248 493 reıs arqyly 3 mln 472 myń 175 tekshe metr qar shyǵaryldy.
Eń aldymen negizgi kósheler men qoǵamdyq kólik júretin baǵyttar tazartylýda. Odan keıin qozǵalys qarqyny ortasha aýmaqtarda – aýlalarda, alańdarda, trotýarlar men aıaldamalarda tazalaý jumysy júrgiziledi.
Qala turǵyndarynyń qaýipsiz qozǵalysyn qamtamasyz etý úshin joldar, trotýarlar men kóshelerge tehnıkalyq tuz sebilýde. Bul jumystar da táýlik boıy atqarylyp jatyr.
Sonymen qatar, aýla aýmaqtaryndaǵy tazalyqty qamtamasyz etý páter ıeleri kooperatıvteri (PIK) men múlik ıeleri birlestikteriniń (MIB) mindetinde. Olar turǵyndardyń qaýipsizdigi men qolaılylyǵy úshin aýlalardy qar men kóktaıǵaqtan ýaqytyly tazalaýy tıis.
Astana qalasynyń ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda barynsha saq bolýǵa, sondaı-aq qolaısyz aýa raıy jaǵdaıynda alys jolǵa shyqpaýǵa shaqyrady.
Eske salsaq, buǵan deıin elordada qar kúreý jumysyna myńnan astam arnaıy tehnıka jumyldyrylǵanyn jazǵan edik.