3 adamnyń ómirin qıǵan Almatydaǵy apat: Avtobýs júrgizýshisine qatysty qylmystyq is qozǵaldy ma

Áleýmettik jelide Almatyda bolǵan apatqa qatysty avtobýs júrgizýshisiniń ústinen qylmystyq is qozǵalǵany týraly aqparat tarady. Osyǵan baılanysty Polıtsııa departamenti túsinik berdi, dep habarlaıdy Kazinform.

Áleýmettik jelide Almatyda jolaýshynyń soqqysynan esinen tanyp, saldarynan qoǵamdyq kólikti basqara almaı qalǵan júrgizýshi áıel ústinen qylmystyq is qozǵalǵany jazyldy.

Qalalyq Polıtsııa departamenti qoǵamdyq kólik júrgizýshisi K. esimdi azamatshadan, jábirlenýshi retinde qylmystyq ister aıasynda jaýap alynǵanyn málimdedi.

Buryn habarlanǵandaı, eki nemese odan da kóp adamnyń ólimine ákep soqqan jol-kólik oqıǵasy deregi boıynsha Almaty qalalyq PD anyqtaý Basqarmasymen QR QK-niń 345-baby 4-bóligi, 351-baby 3-bóligi jáne 293-baby 1-bóligine sáıkes qylmystyq is tirkeldi.

Aıta keteıik, qoǵamdyq kólik júrgizýshisi K. esimdi azamatshadan, jábirlenýshi retinde qylmystyq ister aıasynda jaýap alyndy.Tıisti saraptamalar taǵaıyndaldy, onyń qorytyndysy boıynsha zańdy protsessýaldyq sheshim qabyldanady»,- dep atap ótti vedomstvodan.

Eske salaıyq, Almatyda avtobýs bir top adamdy qaqqan edi. Polıtsııanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan.

Apat saldarynan 7 adam zardap shekti. Jedel medıtsınalyq qyzmet kelgenshe úsheýi qaıtys boldy.

Sondaı-aq, Almatyda avtobýs júrgizýshisin urǵan jolaýshyǵa qatysty qylmystyq is qozǵalǵanyn habarlaǵanbyz.

Keıin ol eki aıǵa qamaýǵa alyndy.