3,8 myńnan astam medıtsına qyzmetkeri MÁSQ-tan tólem aldy

NUR-SULTAN. QazAqparat - COVID-19-ben kúresýge tartylǵan 3 841 medıtsına qyzmetkeri koronavırýstyq ınfektsııany nemese vırýstyq pnevmonııany juqtyrǵan jaǵdaıda memlekettik áleýmettik saqtandyrý qorynan (budan ári – MÁSQ) beriletin birjolǵy áleýmettik tólemdi aldy.

Sondaı-aq, MÁSQ aýrýdyń saldarynan qaıtys bolǵan 37 medıtsına qyzmetkeriniń týystaryna tólem aýdardy, dep habarlaıdy QazAqparat QR Eńbek jáne halyqty áleýmettik qorǵaý mınıstrligine silteme jasap.

Budan buryn habarlanǵandaı, joǵaryda atalǵan tólem tólenetin medıtsına qyzmetkerlerin óńirlerdiń jáne respýblıkalyq mańyzy bar qalalardyń densaýlyq saqtaý basqarmalary janyndaǵy arnaıy komıssııalar aýyrǵan medıtsına qyzmetkerlerin tekserý nátıjesi negizinde anyqtaıdy. Ótinimderdi jınaqtaýdy QR Densaýlyq saqtaý mınıstrligi júzege asyrady, odan keıin ótinimder elektrondyq is maketterin qalyptastyrý úshin «Azamattarǵa arnalǵan úkimet» memlekettik korporatsııasy» KEAQ-qa beriledi, sodan soń tólem taǵaıyndaý úshin MÁSQ-ǵa jiberiledi.

5 qazan saǵat 9.00-degi jaǵdaı boıynsha MÁSQ COVID-19 nemese vırýstyq pnevmonııa juqtyrǵan 3 841 medıtsına qyzmetkeriniń ótinishi boıynsha jáne aýrýdyń saldarynan qaıtys bolǵan 37 medıtsına qyzmetkerine qarjy taǵaıyndap, tóledi.