3,8 mlrd. teńge men 185 myń AQSh dollarynan astam somaǵa jalǵan shot-faktýralar jazyp berý kezinde 63 adam ustaldy

Bul týraly búgin QR Qarjy mınıstrligi Memlekettik kirister komıtetiniń Aldyn alý jumystary jáne baqylaý basqarmasy basshysynyń orynbasary Abzal Baımanov málim etti. «Qolma qol aqshaǵa aınaldyratyn» fırmalardyń zańsyz áreketterinen salyq tóleýden jaltarý, qosylǵan qun salyǵyn zańsyz qaıtarý jáne bıýdjet qarajatyn jymqyrý saldarynan memleket ekonomıkasyna eleýli túrde zalal keltirilýde. Kórsetilgen salada óndiristegi qylmystyq isterdiń sany, ótken jylǵy sáıkes kezeńmen salystyrǵanda 4,4 esege artyp, 451-den 2108-ge deıin ósken. Tirkelgen quqyq buzýshylyqtardyń sany 2,5 ese kóbeıip, 305-ten 782-ge jetip otyr», - dedi ol.

Sonymen qatar onyń alǵa tartqan derekterine sáıkes, 317 qylmystyq is boıynsha tergeý aıaqtalyp, onyń 312-si sotqa joldandy. Tyıym salynǵan múlikti qosa alǵanda 1,6 mlrd.teńge ótelgen.

«Júrgizilgen jedel-izdestirý sharalarynyń nátıjesinde aqsha qarajatyn qolma qol aqshaǵa aınaldyrý jáne 3,8 mlrd. teńge men 185 myń AQSh dollarynan astam somaǵa jalǵan shot-faktýralar jazyp berýi kezinde, ıaǵnı, qylmys ústinde 63 tulǵa ustaldy», - dedi A.Baımanov.