3-6 shilde kúnderi Qazaqstannyń Ulttyq mýzeıine tegin kirýge bolady
ASTANA. QazAqparat - Astananyń 16 jyldyǵyn merekeleý aýqymynda 3-6 shilde kúnder barlyq tilek bildirýshiler Qazaqstan Respýblıkasynyń Ulttyq mýzeıine tegin kire alady. Budan buryn habarlanǵandaı, búgin Memleket basshysy Nursultan Nazarbaev jańa «tarıh ordasyn» saltanatpen ashty, dep habarlady qala ákiminiń baspasóz qyzmeti.
Ulttyq mýzeı - Ortalyq Azııadaǵy teńdesi joq biregeı joba. Ol Astanada Táýelsizdik dańǵyly men J.Nájimedenov kóshesiniń qıylysynda ornalasqan.
Kólemi 74 myń sharshy metrden asatyn Ulttyq mýzeıge Qazaqstannyń erte ǵasyrdan búgingi kúnge deıingi arheologııalyq, etnografııalyq jádigerleri men mádenı eskertkishteri jınaqtalǵan. Ulttyq mýzeıdiń quramynda Astana, Táýelsiz Qazaqstan, Altyn, Ejelgi jáne ortaǵasyr tarıhy, Etnografııa, Tarıh, Zamanaýı óner zaldary bar.
Mýzeı halyqaralyq standarttarǵa saı jabdyqtarmen jaraqtandyrylǵan. Ekspozıtsııalar úshin zamanaýı kórme tehnologııalary: biregeı ıilgish ekran, medıa-eden, qazirgi Astananyń ortalyq bóliginiń serpindi maketi, kóptegen medıaekrandar, gologrammalar, dıodty jaryǵy bar LED-tehnıka, sensorly dúńgirshekter, mýltımedııalyq jolserik qoldanylady.
Osy nysannyń ekspozıtsııalyq aýdanynyń eleýli kólemin eskere otyryp, ǵımaratqa birneshe mýzeıdiń, sonyń ishinde Tarıh mýzeıiniń, Altyn jáne qundy metaldar mýzeıiniń, Óner mýzeıiniń ekspozıtsııalaryn da ornalastyrý josparlanýda.
Mýzeıdiń basty mindetteriniń biri Qazaqstannyń mádenı muralaryn nasıhattaý, Astanany ulttyq jáne halyqaralyq deńgeılerdegi mádenı ortalyq, al Qazaqstan Respýblıkasyn - ejelgi tarıhy men baı mádenıeti bar zamanaýı jáne serpindi damyp otyrǵan memleket retinde dáripteý bolmaq.
