3,6 mln.-nan astam ázerbaıjandyq Konstıtýtsııaǵa ózgerister engizilýin qoldady
BAKÝ. QazAqparat - Ázerbaıjan Ortalyq saılaý komıssııasy «Saılaý» aqparattyq ortalyǵynyń málimetterine sáıkes, Baký ýaqytymen saǵat 19.00-degi jaǵdaı boıynsha, referendýmǵa saılaýshylardyń 69,7 paıyzy, ıaǵnı 3 671 707 adam qatysty.
Eske salsaq, respýblıkada saılaýshylardyń jalpy sany 5 267 111 adamdy quraıdy. El Konstıtýtsııasyna ózgerister engizý úshin referendým búgin, tańerteńgi saǵat 08.00-de bastalyp, keshki saǵat 19.00-de aıaqtaldy.
Buǵan deıin habarlaǵanymyzdaı, saılaýdyń ashyqtyǵyn qamtamasyz etý maqsatynda búkil eldi qamtıtyn 119 saılaý okrýgterindegi 1000 saılaý ýchaskesinde veb-kameralar ornatyldy. 5 myń 600-den astam saılaý ýchaskeleri jumys istedi. Árbir saılaý ýchaskesine 10 baıqaýshydan keldi.
Saılaýdy baıqaý maqsatynda Ortalyq saılaý komıssııasyna EOPA men ózge de halyqaralyq uıymdardy qosa alǵanda 35 memleketten 117 halyqaralyq baıqaýshy qatysty. Eldegi 5 myń 600 saılaý ýchaskesinde 53 myń baıqaýshy otyrdy.
Daýys berý úderisin qysqamerzimdi baıqaý maqsatynda Ázerbaıjanǵa Túrkitildes memleketterdiń Parlamenttik Assambleıasyna kiretin halyqaralyq parlament depýtattarynyń mıssııasynyń ókilderi keldi. Atalmysh mıssııaǵa Qazaqstannyń Parlament Májilisiniń depýtatty Nurlan Dýlatbekov jetekshilik etti.
