3-5 jyldyń ishinde ımportqa táýeldilikti tolyq joıý kerek - Asqar Mamın
NUR-SULTAN. QazAqparat - Aldaǵy 3-5 jyldyń ishinde respýblıkanyń ımport taýarǵa táýeldiligin tolyq joıýymyz kerek. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Bizdiń aldymyzǵa agroónerkásip keshenindegi eńbek ónimdiligin 2022 jylǵa qaraı 2,5 ese arttyrý mindeti qoıylǵan. Jalpy, salanyń ınvestıtsııalyq tartymdylyǵy joǵary dep aıtýǵa bolady. Josparlanǵan ınvestıtsııa kólemi - 1,4 trln teńge. Qazirgi tańda ımportqa táýeldilikti azaıtý maqsatynda ishki óndiristi ulǵaıtý - aýyl sharýashylyǵyn damytýdyń negizgi basymdyqtarynyń biri bolyp belgilengen. Osy josparlanǵan sharalardyń arqasynda aldaǵy 3-5 jyldyń ishinde respýblıkanyń ımportqa degen táýeldiligin joıyp, elimizdi barlyq áleýmettik mańyzy bar taýarlarmen tolyq qamtamasyz etýimiz qajet», - dedi Úkimet basshysy.
Onyń atap ótýinshe, memlekettik qoldaýdy ózektendirýdi kózdeıtin tásilder naqty nátıjege baǵyttalýy tıis. Sýbsıdııa boıynsha bólingen árbir teńge nátıje berýi kerek. Sýarmaly eginshilik pen jem-shóp óndirisin damytý - negizgi mindet bolýy tıis.
«Ekologııa, geologııa jáne tabıǵı resýrstar mınıstrligine jer alqaptaryn sýǵarýǵa ınfraqurylym jetkizý jónindegi keshendi sharalardy iske asyrýdy tapsyramyn. Jalpy, agroónerkásip kesheni boıynsha memleket baǵdarlamasynyń Aýyl sharýashylyǵy mınıstrligi usynyp otyrǵan ózgerister men tásilder osy keshenniń asa mańyzdy baǵyttarynyń damýyna serpin berip, salanyń ınvestıtsııalyq tartymdylyǵyn arttyrady dep sanaımyn», - dedi Premer-Mınıstr.
Sonymen qatar ol QR Aýyl sharýashylyǵy mınıstri Saparhan Omarovtyń sharýalarǵa memlekettik sýbsıdııalar boıynsha bereshekti joıý usynysyn qoldaıtynyn aıtty.
«Saparhan Kesikbaıulynyń aýyl sharýashylyǵyn sýbsıdııalaý jáne ınvestıtsııalyq sýbsıdııa boıynsha bereshekti joıý jónindegi usynystaryn tolyǵymen qoldaımyn», - dedi Asqar Mamın.
