3,5 myń aýyldyń ınfraqurylymy respýblıkalyq bıýdjet esebinen jańartylady - Úkimet

ASTANA. QazAqparat – QR Premer-Mınıstriniń birinshi orynbasary Roman Sklıar aýyl ınfraqurylymyn jańǵyrtýǵa qatysty túsinik berdi, dep habarlaıdy QazAqparat tilshisi.

«Jalpy 2027 jylǵa qaraı aýyl turǵyndarynyń 90 paıyzy turatyn ári damý áleýeti bar 3,5 myń aýyldyń ınfraqurylymy respýblıkalyq bıýdjet esebinen jańartylady. Reforma aıasynda jergilikti ózin-ózi basqarýdyń kiris bazasyn keńeıtý úshin fıskaldy ortalyqsyzdandyrý jalǵasyp keledi. 2018 jyldan bastap 1062 aýdandyq mańyzy bar qalalar, aýyldar kentter jáne aýyldyq aımaqtarda bıýdjettiń tórtinshi deńgeıi engizildi. Bıýdjettiń tórtinshi deńgeıine salyqtar men tólemderdiń 9 túri berildi. Sonyń nátıjesinde aýyldyq okrýgterge jyl saıyn qosymsha 30 mlrd teńge túspek. Sondaı-aq 2020 jyldan bastap shaǵyn jáne orta bıznesten túsetin korporatıvtik tabys salyǵy boıynsha túsimder jergilikti bıýdjetke aýdaryla bastady. Osynyń nátıjesinde jergilikti bıýdjetke túsetin salyq túsimderi 25 protsentke ósti», - dedi R. Sklıar Senattaǵy «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy parlamenttik tyńdaýda.

Onyń aıtýynsha, 2025 jyly aýyldyq okrýgter bıýdjetiniń ózin-ózi qamtamasyz etý deńgeıi 13 paıyzdan 35 paıyzǵa deıin artady dep eskerilgen.

«Óńirlerdiń damýyna jergilikti ózin-ózi basqarý salasyndaǵy reformalar eleýli úles qosyp keledi. 2021 jyldyń shildesinen bastap 1305 eldi mekenniń basshysy saılandy. Tikeleı saılaý engizilgennen beri aýyl ákimderiniń korpýsy 56 protsentke jańardy. 2023-2024 jyldarǵa 1041 aýyldyq okrýgte saılaý belgilengen», - dedi Úkimet basshysynyń birinshi orynbasary.

Budan buryn habarlanǵandaı, «Aýyl - el besigi» jobasy boıynsha bıyl 736 aýyl úshin 1,5 myńnan astam jobaǵa 143 mıllıard teńge bólindi.