$2 trln ekonomıka: Qazaqstan Tszıansý óńirimen áriptestikti tereńdetedi
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaev Qazaqstanǵa alǵashqy saparmen kelgen Tszıansý ólkesi Partııa komıtetiniń hatshysy Sın Chansınmen kezdesti. Bul týraly Úkimettiń baspasóz qyzmeti málim etti.
Kelissózder barysynda taraptar eki memleket basshylarynyń Qazaqstan men Qytaı arasyndaǵy máńgilik jan-jaqty strategııalyq áriptestikti tereńdetý týraly ýaǵdalastyqtaryn júzege asyrýǵa baǵyttalǵan óńiraralyq jáne ınvestıtsııalyq yntymaqtastyqqa qatysty keń aýqymdy máselelerdi talqylady.
Nurlybek Nálibaev Qytaıdyń Qazaqstannyń negizgi saýda-ekonomıkalyq jáne ınvestıtsııalyq seriktesteriniń biri ekenin atap ótti. Qytaıda ekonomıkalyq damý kórsetkishteri boıynsha ekinshi orynda turǵan, jalpy óńirlik ónimi (JÓÓ) $2 trln-nan asatyn Tszıansý ólkesiniń ekonomıkalyq jáne ónerkásiptik áleýetin joǵary baǵalady.
— Tszıansýmen saýda-ekonomıkalyq qatynastardy damytý Qazaqstan úshin erekshe mańyzdy. Bul ólkeni ónerkásiptik kooperatsııa, óndiristerdi qondyrý, ınnovatsııalar, kólik logıstıkasy jáne tsıfrlyq ekonomıka salalaryndaǵy áleýeti zor seriktes retinde qarastyramyz, — dedi QR Premer-mınıstriniń birinshi orynbasary.
Óz kezeginde, Sın Chansın Qytaıdyń Tszıansý ólkesiniń iskerlik toptary men óńirleri arasyndaǵy tikeleı baılanystardy jandandyrýǵa daıyn ekenin bildirdi. Qazaqstannyń logıstıkalyq áleýeti «Qytaı — Eýropa» baǵyty boıynsha úzdiksiz halyqaralyq júk tasymaldaryn qamtamasyz etýde mańyzdy ról atqaratynyn atap ótti.
Sonymen qatar qytaılyq tarap 2026 jylǵy 11 maýsymda Astanada ashylǵan «Ortalyq Azııa — Tszıansý» ortalyǵy tehnologııalar almasý jáne ınvestıtsııalar úshin platforma retinde qyzmet etip, ekijaqty saýda-ekonomıkalyq yntymaqtastyqtyń nyǵaıýyna oń serpin beretinine senim bildirdi.
Buǵan deıin Premer-mınıstriniń birinshi orynbasary Nurlybek Nálibaev jumys sapary aıasynda Aqmola oblysyna kelip, óńir basshysy Marat Ahmetjanovpen birge iri jobalardyń júzege asyrylý barysymen tanysqan bolatyn.
